Frasco niduso og balaodnon alang sa baratong funeral services

CEBU, Philippines — Ang balaodnon nga giduso ni Kongresista Duke Frasco sa kinto distrito alang sa mas barato nga lungon ug funeral services sa nasud ang naapil sa mga balaodnon nga giduso alang sa third ug final reading sa 19th congress atol sa plenary session.

Ang House Bill No. 102 kon mahimong balaod mao na ang “Affordable Funeral Service Act” diin lakip kini sa nakakuha og approval gikan sa mga magbabalaod sa nasud.

Ang maong balaodnon nagtinguha nga makatabang sa mga kabus nga pamilya nga makabenipisyo og barato nga funeral service sa pamilya niini nga nitaliwan.

Ubos sa maong balaodnon, ang tanang punerarya o funeral establishment kinahanglang adunay barato nga serbisyo nga mamahimong makuha sa mga kabus diin dili molapas sa P20,000 ang mabayran gikan sa pagpalit og lungon, mortuary service ug uban pa.

“The Affordable Funeral Service Act upholds the dignity of every Filipino, regardless of their income class, and ensures equitable access to affordable funeral services”, matud ni Frasco sa iyang mensahe atol sa ikaduhang pagbasa sa iyang balaodnon nga giduso.

Si Frasco niduso sa maong balaodnon aron makatabang sa mga kabus nga pamilya nga makahatag og maayo nga funeral service nga dli kinahanglang mogasto og dako kaayo.

Ang maong balaodnon kon mahimo na kininga balaod magtahas sa Department of Trade and Industry (DTI) nga maoy mo monitor ug mohatag og regulasyon sa presyo sa mga funeral services establishment samtang and Department of Social Welfare and Development (DSWD) mao usab ang mohatag og burial assistance o tabang pinansiyal ngadto sa pamilya nga nanginahanglan. (BANAT NEWS)