Milawog og itoy ngadto sa bitin ug halo, gipangita

CEBU, Philippines — Nagpahigayon na og imbestigasyon ang Carmen Municipal Police Station may labot sa viral video nga gi-post sa usa ka ‘Emma Pepito’ nga giingong dunay mag-adopt og mga itoy apan ipakaon ra matud pa sa mga binuhi niining bitin ug hawo.  Si Police Major Charlie Santiago, hepe sa Carmen Municipal Police Station nagkanayon nga pagkasayod nila bahin sa maong post gisusi nila kini dayon. Apan ilang nasuta nga walay ‘Emma Pepito’ nga nagpuyo sa ilang lungsod. Apil sab nilang gisusi ang lugar diin matud pa diha nahitabo ang paglawog og itoy sa bitin ug hawo apan negatibo sab kini.

Nagpatabang karon ang Carmen Police Station sa Regional Anti-Cybercrime Unit-7 aron ma-trace kung kinsa nag-post aron mapangayoan og dugang impormasyon para sa ilang imbestigasyon.

“Maglisod man mi kung mag-start lang mi sa social media post, ang need namo is ang tawo nga makatudlo actually kinsa na pero actually continuous pa among kuan, naa pa sa ground ang among investigator nag-interview pa,” sigon ni Santiago. Base sab sa ilang pakig-alayon sa Local Government Unit sa Lungsod sa Carmen ilabi na sa MENRO wala’y na-report nga adunay ingon ana nga hitabo sa ilang lungsod. – IBM BANAT NEWS