Lokal nga opisyales sa Sugbo natagbaw sa ikatulong SONA ni Marcos

CEBU, Philippines — Pipila sa mga lokal nga opisyal sa Sugbo ang natagbaw ug nidayeg sa ikatulong State of the Nation Address (SONA) ni Presidente Ferdinand “Bongbong” Marcos, Jr..

Ang deklarasyon ni Marcos pagpahunong na sa Philippine Offshore Gaming Operator (POGO) ug ang kusganong pag-angkon niini nga ang Pilipinas maoy tag-iya sa West Philippine Sea (WPS) maoy gidayeg sa opisyales sa Sugbo.

Si Kongresista Emmarie “Lolypop” Ouano-Dizon nagkanayon nga nihatag og powerful nga SONA si Marcos diin gihisgotan niini ang mga importante nga isyu sa nasud sama sa seguridad sa pagkaon ug pagsaka sa presyo sa mga palaliton.

Gidayeg usab ni Dizon ang pagpasaka sa benepisyo sa mga magtutudlo ug ang benepisyo sa PhilHealth.

Nalipay usab si Kongresista sa ikalimang distrito sa Probinsiya sa Sugbo ug Deputy Speaker Duke Frasco nga nahisgotan sa presidente ang nagkadaiyang kalamboan sa imprastraktura ug digital reforms o reporma pagkab-ot sa turismo.

Si Frasco kinsa bana ni Tourism Secretary Christina Garcia-Frasco nagkanayon nga ang inisiyatiba sa Department of Tourism (DOT) pagkab-ot sa tourism digitalization sama sa pag-upgrade sa mga tugpahanan, pagpalambo sa tourism sites ug pagpatuman sa e-travel system ug uban pa nakatabang aron mas molambo pa ug mahimong mas epektibo ang operasyon sa sektor sa turismo.

Si Bokal Stanley Caminero sa ikaduhang distrito sa Probinsiya sa Sugbo nalipay usab tungod sa kalamboan sa sektor sa panglawas nga gitaho sa presidente sa iyang SONA.

Si Caminero kinsa usa ka doktor ug maoy pangulo sa committee on health sa hunta probinsiyal nagkanayon nga dako ang tabang sa pag-umento sa breast cancer PHIC benefit package gikan sa P100,000 ngadto P1.2 million.

Nunot niini, kapin sa usa ka milyon nga mga kawani sa gobiyerno sa nasud ang makadawat na og medical allowance sugod sa sunod tuig.

Gianunsiyo ni Marcos nga iyahang giaprobahan ang paghatag og medical allowance sa mga kawani sa gobiyerno gawas sa pagpataas sa ilang mga sweldo.

Adunay kinatibuk-ang P9.5 bilyon nga gigahin ang gobiyerno ubos sa Miscellaneous Personnel Benefits Fund (MBPF) alang sa tuig 2025 alang sa mga empleyado.

Sugod sa sunod tuig madawat na kini nila isip subsidy alang sa pagpahimulos sa mga benepisyo sa Health Maintenance Organization (HMO) o HMO-type nga benepisyo. Mahimong makabenepisyo niini ang mga empleyado ubos sa national government agencies, state universities and colleges, ug government-owned or -controlled corporations sa executive department. (Gie-Ann N. Tapic/BDB) BANAT NEWS