Nasunogan sa Guizo 101 ka pamilya

CEBU, Philippines — Niabot ngadto sa 101 ka mga pamilya o 393 ka mga individual ang naapil sa listahan sa mga biktima sa sunog sa Sitio San Jose A. Del Rosario, Barangay Guizo sa Dakbayan sa Mandaue sumala pa sa Mandaue City Social Welfare and Services.

Ang CSWS nanghatag og disaster kits ngadto sa mga nasunogan kini base sa kamanduan ni Mayor Jonas Cortes nga paspasan ang paghatag sa dinalian nga tabang.

Maoy gusto ni Cortes ang paghatag dayon sa mga tabang sama sa banig, habol, mga senina ug hygien kit aron adunay magamit ang mga nasunogan.

Nagpadayon pa hinoon ang CSWS sa paghimo sa profiling aron kahatagan og tabang tanan mga nabiktima sa sunog.

Lakip sa gimandu sa mayor ngadto sa CSWS mao ang pag-atiman sa paghatag og pagkaon sa mga nasunogan gikan sa pamahaw ngadto na sa panihapon.

Pipila sa mga residente nga nasunogan ang wala gayuy nabitbit tungod sa kadali sa pagkaylap sa maong kayo.

Matud pa sa usa sa mga nasunogan, kapila na hapit masunog ang ilang dapit apan dali ra kini matabang sa pagtinabangay sa mga residente, apan huwebes sa hapon wala na kini madala tungod sa kakalit kadako sa kayo human adunay giingon nga nibuto.

Ang kabomberohan padayon pa hinoon sila nihimo og pakisusi sa hinungdan sa pag-ulbo sa maong sunog.-- Romeo Limpangog, IBM BANAT NEWS