Kalungsoran sa North Cebu gibahaan

CEBU, Philippines — Gatosan ka mga pamilya ang gipabakwit tungod sa grabeng ulan ug pagbaha sa mga kalungsoran sa amihanang bahin sa Sugbu niadtong Hulyo 17,2024.

Sa lungsod sa San Remigio, dili momenus 80 ka indibidwal ang napabakwit tungod sa baha human nga ang tubig nisulod na sa ilang mga pinuy-anan.

Tungod sab sa kataas sa tubig, gidid-an sa pagtabok ang mga motorista ug mga tawo sa   Busugon Avante tungod sa grabeng ulan.

Sa Dakbayan sa Bogo, siyam (9) ka pamilya ang napakbakwit gikan sa Barangay Taytayan ug sa Barangay Nailon.

“Nisaka ang tubig sa creek, ni-overflow naman sya. Naa na sila gapuyo sa low-lying area. Gipa pre evacuation daan namo,” matud ni Rex Leoben Ygot ang pangulo sa City Disaster Risk Reduction and Management Office (CDRRMO).

Dugang ni Ygot ang dalan pud sa Don Pedro wala usa maagii sa mga gagmay nga sakyanan hangtod mga alas 10 sa gabii niadtong Hulyo 17. Ang sa Barangay Dakit milapas pud ang tubig sa creek.

Samtang sa lungsod sa Daanbantayan, 158 ka indibidwal ang gipabakwit gikan sa barangay Poblacion,  Talisay, Maya, Bitoon ug Pajo tungod sa baha kon diin pipila sa mga dapit sa maong mga barangay niabot na lapas tuhod ang tubig.

Sa lungsod sa Medellin, ang dalan padulong sa Daanlungsod ang wala usa maagii human natumba ang kahoy sa gemelina sa dalan, hinoon naagian ra sad dayon niatong gabiona.

Sa lungsod sa Santa Fe, 50 ka pamilya ang gipabakwit daan tungod kay anaa kini nagpuyo duol sa “swamp” o katunggan kay ang tubig mosulod gyud sa mga balay hilabina kun kusog ang ulan.

Samtang didto sa lungsod sa Sogod, matud ni Maria Alia Zamora ang pangulo sa MDRRMO didto nga wala ray dakong epekto ang pagbunok sa ulan sa ilang lungsod. Adunay mga gagmay nga baha apan nadumala ra pud dayon kini sa mga barangay.

Ang lungsod sa Poro, Tudela ug San Francisco sa isla sa Camotes wala pud nataho nga dagkong nahitabo o kadaot tungod sa grabeng ulan. Wala usab natala nga baktwit ang maong mga lungsod sumala mga opisyal sa DRRM didto. Matag MDRRMO sa mga lungsod ug siyudad sa amihanang Sugbo ang padayon nga nagbantay sa ialng mga lugar hilabina ang mga dapit nga delikado sa pagbaha. (BANAT NEWS)