EDITORYAL - Walisin na ang POGO

WALANG naitulong sa ekonomiya ng bansa ang Philippine Offshore Gaming Operator (POGO). Sa halip na makatulong, kinatatakutan pa ng mga foreign investors ang Pilipinas dahil sa mga nangyayaring krimen. Laganap ang patayan, kidnapping, prostitution, investment scam, cryptocurrency scam at human trafficking.

Nagsimula ang POGO sa bansa noong 2017 at makaraan ang pitong taon, walang nagawa para mapaunlad ang bansa. Maraming naglutangang illegal POGOs na hindi naman masawata ng PAGCOR. Nasa 300 ang illegal POGOs ayon sa Presidential Anti-Crime Commission (PAOCC). Kabilang sa mga illegal POGOs ay ang sinalakay sa Bamban, Tarlac na nakatayo sa compound na pag-aari umano ni suspended Bamban Mayor Alice Guo. Iniimbestigahan ng Senado si Guo dahil sa kahina-hinalang pagkatao. Nadiskubre ng NBI na magkapareho ang fingerprints ni Guo at ng Chinese national na si Guo Hua Ping.

Sinalakay din ang POGO hubs sa Porac, Pampa­nga na may 46 na gusali. Hindi lamang online gaming ang ino-offer ng POGO hubs sa Porac kundi pati na rin panandaliang aliw at iba pang illegal na aktibidad. Sa POGO hubs din sa Porac, nadiskubre ang mga uniporme ng China Army na nagpapalakas sa paniwalang may mga nakapasok na espiya sa bansa.

Nabulabog ang bansa dahil sa POGO. Pawang pag-iimbestiga sa POGOs ang ginagawa ng Senado. Ang Philippine National Police at PAOCC ay nakatutok sa paghabol sa mga Chinese na nag-ooperate ng illegal POGOs. Maraming oras na ang nauubos ng mga awtoridad dahil sa POGOs. Walang nakukuha ang pamahalaan sa POGOs kundi pawang problema at pagkasiphayo.

Parami nang parami ang nananawagan kay President Ferdinand Marcos Jr. na buwagin na ang POGOs. Marami nang senador ang naniniwalang dapat nang itigil ang POGOs sapagkat nalalagay sa peligro ang bansa. Ginagamit ito ng mga fugitives na Chinese at ang resulta, maraming krimen ang nagaganap sa bansa.

Maski si Finance Secretary Ralph Recto ay pabor para sa total ban ng POGO. Sabi ni Recto, nagpadala na siya ng liham ng kanyang rekomendasyon kay President Marcos Jr. na nagpapatigil sa POGO. Maraming mayor na rin ang nagbawal sa pagpasok ng POGO sa kanilang lungsod.

Itigil na ang POGO. Bago pa tuluyang mapinsala ang bansa dahil sa POGOs, ipagbawal na itong tuluyan. Nararapat kumilos ang Presidente at dinggin ang panawagan nang nakararami.