13 nadakpan sud sa drug dens

CEBU, Philippines — Duha ka drug dens sa dakbayan sa Talisay ug siyudad sa Sugbo ang giguba samtang 13 ka indibidwal ang nadakpan sa gihimong pagpangronda sa Philippine Drug Enforcement Agency(PDEA)-7 niadtong Hunyo 11, 2024.

Ang mga operatiba sa PDEA-7 uban ang Talisay City Police Station miguba sa drug den sa Sitio Kilawan, Barangay Tangke, Talisay City nga miresulta sa pagkasikop sa napulo ka tawo.

Nadakpan sa maong operasyon ang subject ug drug den maintainer nga si Lora Lie Lisondr alyas Nanay, 52.  Apil sab sa nasikop ang siyam nga tigbisitahan sa drug den nga sila si Jerry T. Fernandez, 58, mananagat ug PWD; Genevieve L. Cabando, 24; Rosalie M. Gabisan, 47; Marie Lourdes J. Pelare, 27; Marie Cris D. Juezan, 47; Lorna C. Quiobe; Van D. Cabando, 48; Erick C. Reyes, 45; ug usa ka 17-anyos nga lalake.

Nakompiskar atol sa operasyon ang 17 ka putos sa gituohang shabu nga nitimbang og 16 gramos ug gibana-bana nga nagkantidad og P108,000, buy-bust money, kwarta nga P240 nga gituohang halin illegal nga drugas ug nagkalain-laing drug paraphernalia.

Samtang pasado alas 5 sa hapon sa samang adlaw, laing drug den sa Sitio Callejon 11, Barangay Labangon, Cebu City ang giguba sa PDEA-7 ug Cebu City Police Station 10 diin tulo ang nadakpan.

Nasikop sa maong operasyon ang subject ug tigmentinar sa drug den nga si Joven Ballientos, 40; apil sab ang mga tigbisitahan sa drug den nga sila si Joseph Ken-Ken Endaya, 30; ug Reneboy Carlos Ballentos, 46.

Nakuhaan ang mga dinakpan og 10 ka putos sa gituohang sbabu nga nitimbang og 11 grams ug nagkantidad og P74,800, duha ka empty sachets nga dunay residue sa shabu, buy-bust money, kwarta nga P120 nga halin matod pa sa drugas, usa ka cellphone ug nagkalain-laing drug paraphernalia.--  IBM BANAT NEWS