High-tech infirmary gimontar sa CCSC

CEBU, Philippines — Usa ka high-tech infirmary o mini hospital ang gimontar sulod sa Cebu City Sports Center nga mo atiman sa mga atleta sa Palarong Pambansa nga makabaton og problema sa panglawas o injuries.

Nasayran nga 30 ka atleta ang na-injured ang ilang naserbisyohan sukad sa pagsugod ang Palaro.

Usa ka babaye’ng atleta sa Wushu ang daling gidala sa infirmary human na-injured ang iyang ibabaw’ng bahin sa lawas tungod sa kusog nga patid sa iyang kontra.

Dali kini giatiman ug ug gi-refer ngadto sa tambalanan.

Samtang usa ka basketball athlete gikan sa CARAGA Region ang giatiman sa infirmary tungod sa injury sa iyang tuhod diin dili na kini mapiko.

Ang tuhod sa maong atleta ang gipasuyopan og fluid diin ang procedure diha gipahigayon sa infirmary diin libre kini.

Pipila lang sila sa mga giatiman sa mini hospital nga maoy labing una nga gimontar sa kasaysayan sa Palarong Pambansa.

Matud ni Dr. Rhoel Dejano, medical head nga complete package ang maong mini hospital diin aduna sila’y mini laboratory nga makadeterminar kon adunay nabitas nga tissue o fracture ang ilang pasyente.

Adunay mga psychologist o counselor nga mo proseso sa mga atleta ilabi na kadtong dili na mahimong makaduwa tungod sa injury.

Gibutyag ni Dejano nga adunay mga pasyente nga nagkinahanglan nga dad-on sa tambalanan sama sa Cebu City Medical Center.

Si Dr. Peter Mancao, medical director sa CCMC nibutyag nga kapin 100 na ka atleta ang nadala sa maong tambalanan diin kasagaran mga minor cases lang o kutob lang sa OPD.

Niabot ngadto sa 20 ang na admit apan kasagaran nakagawas usab dayon kini gikan sa tambalanan.

Gawas sa mga naangkon nga injury adunay mga na-dengue apan didto sa point of origin ang transmission ug dinhi na sa Cebu nag manifest. BDB BANAT NEWS