Alcover posibleng mobuwag sa partido barug

CEBU, Philippines — Dako'g posibilidad nga mu deklar isip independent si Konsehal Pastor "Jun" Alcover nonot sa sitwasyon sa politika sa dakbayan apan midugang nga iya pa kini nga giobserbaran.

Si Alcover midaog ubos sa BARUG Team Rama sa 2022 eleksyon, sa iyang interview sa mga reporter nagduha-duha na siya modagan pagbalik ubos sa susamang partido.

Sa iyang pagtan-aw, miangkon si Alcover nga adunay problema sa sitwasyon sa politika sa dakbayan, ug mitataw nga wa pa'y klarong direksyon alang sa 2025 midterm nga piniliay.

“We have to admit nga duna gyud mi problema“suma ni Alcover

“Pero ako sa akong kaugalingon, murag mu declare nalang kog indepente tingali,” dugang niya.

Matud ni Alcover, bisan og nindot nga mauban sa usa ka partido apan importante kaniya ang prinsipyo.

“Sa pagkakaron, kung imong tan-awon, independently man na akong mga stance dinha sa council…so ana lang sa ta for the meantime, while nag observe pa ta sa political situation kay daghan pa kaayong development,” saysay ni Alcover.

Sa susamang interview, mitug-an si Alcover nga ilang gisuta kung aduna bay pundo sa gobyerno ang gigamit atol sa Independence Day Celebration niadtong Hunyo 12, 2024 nga gipasiugdahan sa BARUG.

Atol sa kalihokan, miatubang sa iyang mga taga suporta si Mayor Michael Rama nga kasamtangang anaa sa unom ka buwan nga suspension samtang ang iyang kanhi ka-tandem ug karon Acting Mayor nga si Raymond Alvin Garcia, wa makatunga tungod sa "prior engagement".

Usa ka adlaw human sa kalihokan, misaysay si Alcover nga nagkastorya sila ni Garcia atol sa iyang programa sa radyo.

“Kay duna man gu’y nangutana kung unsay status anang program nga gihimo ni Mayor Mike Rama, duha na ba daw kabuok mayor?” saysay ni Alcover. Apan giklaro ni Alcover nga gipangutana ni Garcia kung adunay government vehicles nga gigamit atol sa kalihokan.

“Kay kung naay mga government vehicles nga gigamit, that’s another story kay suspended gud ang mayor so dili sya ka makagamit sa facility sa gobyerno,” matud ni Alcover.

Dugang ni Alcover, ila sab giklaro karon kun nanginlabot ba ang LGU sa maong kalihokan.