Garcia nagtinguha nga walay nay informal settlers

CEBU, Philippines — Si Acting Mayor Raymond Alvin Garcia, sa Dakbayan sa Sugbo nagtinguha nga wala nay informal settlers o mga nagpuyo dinhi sa Dakbayan sa Sugbo sa luna nga dili ilaha.

Kini ang gipadayag ni Garcia atol sa iyang pagpamulong sa “Regional Housing Visit and Roadshow” nga gipahigayon diha sa Cebu City Sports Club niadtong Lunes nga gitambongan sa mga sakop sa Organization of Socialized and Economic Housing Developers of the Philippines Inc. (OSHDP).

Gibutyag ni Garcia nga lisod ang iyang mga pangandoy tungod kay pipila lang siya ka bulan molingkod isip mayor sa siyudad apan naglaom siya nga pinaagi sa pakig-alayon sa line agencies mahatagan kini og katumanan. Naglaom usab si Garcia sa iyang paglingkod sa katungdanan madugangan pa ang mga medium-rise building alang sa mga kabus sama sa MRB nga anaa nahimutang sa Barangay Lorega San Miguel.

Gipangandoy ni Garcia nga aduna nay katumanan ang housing program ni Presidente Ferdinand Marcos, Jr. dinhi sa Siyudad sa Sugbo.

Dugang ni Garcia nga adunay luna sa iyang kasing-kasing ang housing project alang sa mga kabus nga maoy pangandoy ni kanhi mayor Alvin Garcia nga iyang amahan. BDB BANAT NEWS