Koleksyon sa Office of the City Market sa siyudad Misaka
CEBU, Philippines — Nasuta nga nisaka ang kita sa Office of the City Markets (OCM) karon gikan sa Enero ngadto sa Marso sa P35.37milyones nga mas taas ikomparar sa nilabay nga tuig sa susama nga buwan.
Matud pa sa tigpamaba sa OCM John Paul Amores, ang OCM nakakolekta lang ug P34.8 milyones sa nilabay nga tuig ug nisaka kini karon ug nakakuha sila og dugang 564,516.08 hinungdan niabot karon ngadto sa P35.37milyones.
Sumala pa ni Amores, malaumon ang market administrator nga si Robert Barquilla nga makab-ot ang ilang target nga kita sa merkado nga mokabat sa 150milyon ka pesos.
Ang maong nakolekta naggikan sa rentals, penalties sa mga violators sa market code ug ingon man bayad sa parking, “arkabala” o cash tickets, ug miscellaneous fees.
Dugang pa ni Amores, dako ug tabang ang mga nagdumala ug appraiser nga nadestino sa Carbon Public Markets unit, Pasil Fish Market ug lakip ang satellite markets sa siyudad. Ang mga satellite market sa dakbayan naa nahimutang sa barangay Cogon-Ramos, Punta Princesa, Guadalupe, T.Padilla. Taboan ug Poblacion Pardo.
Ang OCM nakakolekta usab og koleksyon gikan sa Warwick Barracks, ug Freedom Park.
“Nagmalaumon ang atong market administrator nga si Robert Barquilla nga makab-ot ang atong target sa income sa merkado nga mokabat og P150 million,” suma ni Amores sa programa sa Sugboanon channel. (BANAT NEWS)
- Latest
