Desinyo sa bus terminal sa CBRT wa mauyoni sa mga opisyal

CEBU, Philippines — Wala uyoni sa mga opisyal sa Probinsya sa Sugbo ang desinyo sa bus terminal nga itukod sa Osmeña boulevard sa dakbayan sa Sugbo subay sa pagpatuman sa Cebu Bus Rapid Transit (CBRT).

Ang implementers sa CBRT gipangulohan sa project manager niini nga si Engr. Norvin Imbong mipresentar sa maong disenyo ngadto ni gobernador Gwendolyn Garcia, bise gobernador Hilario Davide III ug mga bokal sa Probinsya sa Sugbo.

Lakip nga gipresentar nila ni Imbong ang planong pagpanindot sa sidewalk sa Osmeña Boulevard gikan Capitol building padulong sa Fuente Rotunda pinaagi sa pagbutang og streetlights, paving blocks ug uban pa nga gisuportahan sa mga opisyal. Apan pag-abot sa mismong desinyo sa bus terminal sa CBRT wala kini nakakuha og pag-uyon sa mga dagkong opisyal sa Kapitolyo sanglit matod pa ang desinyo makaguba sa visual ug cultural nga integrity sa Cebu Capitol Building nga usa ka historical landmark.

Atol sa ilang tigom niadtong Abril 30, si Imbong nagkanayon nga nakasabot siya sa sentimento sa mga opisyal sa Kapitolyo apan ang pag-usab sa desinyo anaa sa pagbuot sa Department of Transportation (DOTr), nga maoy lead agency sa pagpatuman sa CBRT.

Kompyansa hinoon si Garcia nga ikonsiderar sa DOTr ang concern ug sentimento nilang mga opisyal sa Probinsya.

Gawas sa pagsupak sa disenyo, ang kahuot nga madala sa CBRT sa Osmeña Boulevard maoy nahimong kabalaka sa mga opisyal sa Kapitolyo sanglit ang terminal mokaon man og daku sa dalan nga moresulta nga maghuot ang ubang mga sakyanan pribado man o pasaheroan sa mahabilin nga lane sa karsada sa maong dapit.

Giawhag sa Kapitolyo ang mga implenters nga mangita og solusyon niini ilabina nga makaapekto kini sa adlaw adlaw nga kalihokan sa mga tawo nga moagi sa maong lugar. (BANAT NEWS)