Mandaue City nag-una  sa serbisyo sa mga solo parents

CEBU, Philippines — Giila karon sa Department of Social Welfare and Development DSWD-7 ang siyudad sa Mandaue sa mga Local Government Unit (LGU) nga adunay labing maanindot nga gihan-ay nga serbisyo sa mga solo parents.

Ikaduha mao ang siyudad sa Talisay ug ikatulo ang siyudad sa Lapu-Lapu.

Sa pagsaulog sa Solo Parents Day nagtagbo ang pipila ka mga focal person sa DSWD-7 Family Welfare Sector aron pagpahibawo sa publiko sa ilang mga serbisyo ug programa alang sa maong sector. 

Ang selebrasyon nga dunay tema nga, Solo Parent na Rehistrado, sa Gobyerno Tiyak na Protektado! Gitumong kini aron pahinumduman ang solo parents nga moparehistro sa ilang matag local government units aron makapahimulos sa mga benepisyo nga gitagana alang kanila.

Nunot niini ilang gipadayag ang mga programa ug serbisyo nga nagpakabana sa sektor sa mga ginikanan nga nag-inusara sa pagpadaku sa ilang mga anak.

Samtang gidasig usab ang mga LGU sa pagpadayag sa ilang mga best practices sa paghatag og tabang ngadto sa mga solo parents. (BANAT NEWS)