Mga tinun-an sa publikong eskwelahan ipaubos sa behavioral assessment
CEBU, Philippines — Nanawagan karon ang konseho sa Dakbyan sa Sugbo sa pag-umol og behavioral assessment intervention ngadto sa mga tinun-an pinaagi sa Department of Health (DOH)-7 ug Department of Education (DepEd)-7 subay sa gihimong imbestigasyon diin usa ka tinun-an nangangkon nga gipatiran sa iyang magtutudlo sa Dakbayan sa Sugbo.
Natuki kini atol sa regular session niadtong Miyerkules dihang gi-endorso ang report ngadto sa konseho sa siyudad.
Base sa maong report nga gihimo dayon ang imbestigasyon human nireklamo ang ginikanan sa estudyante sa usa ka public high school sa siyudad nga giingong gipatiran sa iyang maestro.
Atol sa pagtuki, si Konsehal Mary Ann de los Santos, chairman sa committee on mental health niduso og motion nga nag-awhag sa DOH-7 uban sa koordinasyon sa DepEd-7 sa pagpahigayon ug epidemiological survey sa tanang pampublikong tunghaan sa Dakbayan sa Sugbo aron sutaon ang mga problema sa behavioral health sa komunidad sa tunghaan.
Gihangyo usab ni de los Santos ang City Health Department (CHD) pinaagi sa behavioral health program division nga makig-alayon sa Department of Social Welfare Services (DSWS) ug tigumon ang student assistance program team nga gilangkuban sa mga hingtungdang ahensiya kauban ang mga opisyal sa eskwelahan aron masusi ang mga panginahanglanon sa mga estudyante alang sa behavioral interventions.
Giawhag usab ni de los Santos ang DSWS sa pakigtambayayong sa CHD sa paghimo og guidelines sa implementasyon sa City Ordinance No. 2691 aron mapadali ang implementasyon niini sa eskwelahan ug mamenosan ang negatibong epekto sa lain-laing mga butang nga makaapekto sa behavioral health sa mga estudyante.
Ang maong resolusyon giaprobahan kini sa konseho sa siyudad human sa letter report sa Legal Office sa Department of Education Region VII-Central Visayas pinetsahan niadtong Pebrero 27, 2024 nga nagpresentar sa ilang komprehensibo nga fact-finding nga imbestigasyon sa insidente.
Sa maong report, nasayran nga ang DepEd Schools Division Office sa Dakbayan sa Sugbo nipasiugda og diyalogo sa mga nalambigit niadtong Pebrero 23, 2024. (BANAT NEWS)
- Latest
