OBO gihangyo sa pagsusi sa mga establisamento

CEBU, Philippines — Nihangyo ang Cebu City Council ngadto sa Office of the Building Official (OBO) sa pagsusi sa mga atubangang bahin sa mga business establishment duol sa kadalanan aron masiguro nga walay kadena o mga hikot nga delikado alang sa mga pedestrian.

Giaprobahan sa konseo sa siyudad ang resolusyon ni Konsehal Lorenzo Abellanosa kabahin sa maong awhag.

Matud ni Abellanosa nga adunay pipila ka mga establisamento nga adunay pisi o kadena nga anaa dapit sa mga sidewalk.

"These barriers not only hinder or inconvenience the pedestrians but endanger them as well, as they are forced to walk over them or avoid them altogether by walking on street gutters and sometimes on the road which can very well be the cause of accidents", padayag ni Abellanosa.

Lakip sa gihangyo sa konseho ngadto sa OBO ang pagsumitir og report sulod sa 15 ka adlaw.

Ilaha usab nga gihangyo ang OBO sa paghimo sa angay nga mga lakang kong adunay masugatan nga mga problema atol sa inspeksyon.

Sa laing bahin, si Cebu City Councilor Rey Gealon niduso usab kini og resolusyon nga naghangyo usab sa OBO inspector, developer representatives, administrator ug management sa median condominium sa La Guardia Extension sa Barangy Lahug nga motunga sa usa ka executive session aron sa pagtino ngadto sa konseho kalabot sa insidente sa usa ka bata nga nahulog sa condominium.

Hisgotan usab sa executive session ang kaluwasan sa mga residente sa condominium.

Niadtong Abril 8, 2024 usa ka 4-anyos nga bata ang nahulog gikan sa 27 ka andana sa condominium.

Daling gidala ang biktima ngadto sa tambalanan apan patay na kini nga naabot sa tambalanan. (BANAT NEWS)