Mga fire hydrant minus na og agas sa tubig

CEBU, Philippines — Nihinay na ang mga fire hydrant nga kuhaanan og tubig nga gigamit alang sa pag rasyon sa mga barangay nga nagkinahanglan og tubig sa siyudad sa Talisay.

Kini maoy gibutyag ni Joel Sisa, pangu sa operation sa Talisay City Disaster Risk Reduction and Management Office (CDRRMO).

Matud pa ni Sisa nga makapa alarma kini tungod kay diha sa mga fire hydrant sila magkuhaan og tubig para rasyon ingon man tubig alang sa kabomberohan nga motubag sa alarma sa sunog.

Sud sa 43 ka mga fire hydrant sa Talisay, tulo nalang ang kanunay nila nga maghatag og tubig apan nihinay na sad ang agas niini.

Nabantayan nga ang uban nga fire hydrant gubaon samtang ang uban di na gyud makabuga og tubig.

Nagkanayon si Sisa nga posible nga molanat pa sa mosunod nga mga buwan ang suliran sa tubig sa ilang dapit.

Sa pagbisita nila sa Jaclupan Dam makita sab nga nihubas gyud ang tubig gumikan sa grabe nga kainit.

Hinungdan nga siya nihangyo sa Talisaynon nga magdaginot o maghinay-hinay sa paggamit og tubig. (BANAT NEWS)