Mga barangay sa Talisay girasyonan og tubig sa CDRRMO

CEBU, Philippines — Duha ka barangay sa Dakbayan sa Talisay ang giayudahan og tubig sa taga City Disaster Risk Reduction and Management Office (CDRRMO).

Si Joel Sisa, pangulo sa operation sa CDRRMO nagkanayon nga ang barangay nga padayon nila gihatagan og rasyon nga tubig mao ang Maghaway ug Tapul.

Nasayran nga panagsa na lang nila nga rasyonan og tubig ang mga barangay sa Manipis, Linao,Jaclupan ug pipila ka barangay.

Matud ni Sisa nga ang ilang buhatan wala makadawat sa taho kalabot sa pagrasyon og tubig sa mga barangay sa Cansojong ug San Roque apan posibleng ang kabomberohan sa siyudad ang nirasyon sa maong mga barangay.

Si Sisa nagkanayon nga ang ilang pagrasyon og tubig magpadayon pa kini hangtud sa sunod buwan.

Ang mga tinubdan sa tubig sa siyudad ilabi na sa mga bukirang barangay ang nihinay ang agas gumikan sa grabeng kainit. BDB BANAT NEWS