Mandaue nanglimpiyo na sa mga kanal ug manhole

CEBU, Philippines — Gihingusgan na karon sa kagamhanan sa Siyudad sa Mandaue ang pagpangandam sa panahon nga mosulod na  ang bulan sa ting-uwan niining tuiga pinaagi  sa gihimo nilang pagpanglimpiyo sa ilang mga kanal, kasapaan ug gipang-ablihan usab nila  ang ilang mga manhole alang sa paghawan sa mga basura nga makaali sa pagdagayday sa tubig nga maoy makaingon sa pag-awas o pagbaha.

Sa Barangay Ibabao-Estancia gihimo ang bayanihan nga sestema sa pagpanglimpiyo sa karsada ug sa mga suok-suok nga dapit niini.

Si Mayor Jonas Cortes uban ni City Councilor Jen Del Mar maoy nangulo sa gihimo nga clean-up drive.

Si Cortes nagkanayon nga mahinungdanon kaayo ang pagpanglimpiyo sa tugkaran o sa kabarangayan aron pag-abot sa ting-uwan walay basura nga makabara sa kanal.

Si Cortes nanghinaot nga ang matag Mandauehanon mohimo sa husto nga paghipos sa basura alang sa limpiyo nga palibot, himsog nga panglawas sa matag molupyo. 

Nunot niini, ang Mandaue City Task Force  APAS ( Atoang Problema  Atoang Sulbaron) ang padayon na usab karon sa pagpanglimpiyo sa mga kanal ug mga manhole sa kabarangayan isip pagpangandam sa panahon sa ting-uwan.

Ang mga personnel sa City Engineering Office (CEO) nagpahigayon og de-clogging ug desilting operation sa mga kanal nga nagtadlas sa Barangay Looc sa maong dakbayan.

Naglakip sa ilang gihimo mao ang pag-abli sa mga manhole ug gihabwa ang mga lapok nga maoy nakaingon sa pagkamabaw  sa drainage nga mahimong hinungdan sa pag-awas sa tubig panahon sa ting-uwan. — /BDB (BANAT NEWS)