Libaongon nga karsada sa brgy Dumlog sa Talisay naayo na

CEBU, Philippines — Nahuman na ang pagtrabaho sa libaong nga karsada sa Cebu South Coastal Road (CSCR) habig sa Barangay Dumlog, Dakbayan sa Talisay.

Ang Department of Public Works and Highways (DPWH) maoy nitrabaho niini atol sa Semana Santa ug karon hapsay na nga agian.

Miabot sa 200 metros sa karsada ang giayo tungod sa kanunay nga reklamo sa mga motorista tungod sa kadaghan sa libaong nga moresulta sa pag untol untol sa sakyanan nga moagi sa lugar.

Sa nasayran sa maong karsada usab sagad dunay mahitabo nga aksidente ug taud taud na nga gireklamo.

Si Jonathan Tumulak, pangu sa City of Talisay-Traffic Operation Development Authority (CT-TODA) nibutyag nga gipaspasan sa taga DPWH ang pagtrabaho ug kini nahuman sa pagliwas sa Semana Santa.

Suma pa niya nga paspas na ang paggawas sa mga sakyanan nga gikan sa habagatan nga mopaingon sa siyudad sa Sugbo.   MEL BANAT NEWS