Mga tanod gibansay; Manglungkabay mga badlongon sa Carreta

CEBU, Philippines — Gibansay sa kapolisan sa Dakbayan sa Talisay ang mga barangay tanod sa Barangay Biasong kabahin sa pagdakop sa mga tawo nga badlongon.

Kini gumikan sa hangyo ni Kapitan Reynaldo Bas diin ang tumong niini nga kahatagan og kaalam ang iyang mga sakop sa ilang trabaho.

Ang mga tanod pila na ka higayon gipaubos sa training ug seminar apan alang ni Bas nga mas maayo nga ipaubos og balik sa training ang mga tanod aron dili makalimot sa ilang nakat-onan.

Nasayran nga tunga sa adlaw gihimo ang training sa basic surveillance and casing, report writing ug basic investigation procedure.

Gilakip sa pagbansay ang ilang pagpatrolya ug mga paagi sa pagaresto sa tawo nga adunay kalapasan sa lagda sa balaod. Matud ni Bas nga mas maayo nga mahibawo sa paagi sa pagdakop ang mga tanod aron dili sila maoy maalanganin sa mga kriminal nga ilang dakpon.

Ang kapolisan sa Talisay magpadayon sa paghimo og pagbansay sa mga tanod diha sa kabarangayan sa siyudad.

Sa laing bahin, nasayran nga badlongon sa Barangay Carreta ang duha ka manglungkabay nga nadakpan sa Parian Police Station niadtong Domingo tungod kay daghan sila og kasong giatubang kini base sa gihimong pakisusi sa Cebu City Police Office (CCPO).

Sayo pa, nagtingkagol sa prisohan ang mga suspetsado nga sila si Francis Jake Bunal Padayao, 27-anyos, nagpuyo sa 461 V. Rama Street, Barangay Calamba ug Anthony Pilapil, 27, residente sa Sitio Mahayahay 2, Barangay Calamba niining siyudad human nanglungkab sa opisina sa Archdiocesan Campus Ministry sa niaging adlaw.

Matud ni Police Lieutenant Colonel Janette Rafter, deputy city director for operations sa CCPO nga si Padayao nadakpan na kaniadto sa kasong robbery, paghupot og ilegal nga drugas ug illegal possession of firearms.

Samtang si Pilapil nadakpan kaniadto sa kalapasan sa Presidential Decree 1602 kun “Illegal Gambling”. (BANAT NEWS)