4-anyos natagak gikan 27th floor

CEBU, Philippines — Patay nga na nga nadangat sa tambalanan ang usa ka kwatro anyos nga batang lalake human natagak gikan sa ika-27 nga andana sa usa ka condominium diha sa La Guardia Extension, Barangay Lahug, siyudad sa Sugbo kagahapon sa buntag.

Ang maong bata nagpuyo sa 27th  floor sa condiminium  diin dead-on-arrival na kining naabot sa ospital.

Sa report sa Mabolo Police Station pinangulohan ni Major Romeo Caacoy alas 9 sa buntag kagahapon nila nadawat ang alarma.

Nagkanayon si Caacoy sa pakighinabi nila sa inahan sa bata kini miingon nga ninaog matud pa siya kay nagkuha og kape, niadto kini sa ground floor.

Adtong higayona sa iyang pagnaog natulog matod pa sa ilang kwarto ang iyahang anak. Sa pagbalik matod pa sa inahan wala na niya makita ang bata sa kwarto.

Gipangita niya kini hangtod nakadungog siya og estorya nga dunay bata nga nahulog maong iyaha kining gidagan ug nahibaw-an nga iyang anak ang natagak.

 “Di ba pikas side naa man nay abli adto padung sa terrace, naa man nay terrace ang condo unya didto ang bata, paminaw ko nangita guro ang bata niya, nikatkat siguro didto og bangko,” matud ni Caacoy.

Nagkanayon si Caacoy nga nangita sila og CCTV footage aron masuta gyud kung unsay nahitabo nganong nahulog ang 4-anyos nga batang lalake.

Sa pikas bahin, ang management sa Citrineland Corporation nga nagdumala sa condominium nasubo sa maong hitabo ug misaad nga mokooperar sa gihimong imbestigasyon sa kapolisan.

Mipasalig sab sila nga palig-unon pa ilang seguridad ug safety sa mga residente ug bisita sa ilang condominium aron di na masubli ang nahitabo.  (BANAT NEWS)