Duha ka Koreano nga nanulis gipasakaan og kaso
CEBU, Philippines — Kasong Robbery with Homicide ug Direct Assault with Frustrated Homicide ang gipasaka batok sa duha ka Korean Nationals nga nadakpan human nanulis og laing Korean National sa usa ka high-end subdivision sa Barangay Banilad, siyudad sa Sugbo, niadtong Martes sa gabii Abril 2.
Matud ni Police Major Romeo Caacoy Jr., Hepe sa Mabolo Police Station nga nakig-alayon na usab ang kapolisan sa Korean Consulate labot sa maong hitabo.
Sigon ni Caacoy naistorya na sa Korean Consulate ang mga suspek dungan sa pagbutyag sa kapolisan nga mohatag sila sa mga report nga kinahanglanon sa kunsulado.
"Akong nakita nila medyo nasagmuyo sila ug naluoy sab sila sa police nato nga nasamdan, nipakita sab sila og simpatiya", suma ni Major Caacoy.
Segun sa impormasyon nga nakuha sa kapolisan nakabase sa Manila ang mga suspek ug nianhi lang sa Sugbo aron manulis.
Samtang si Police Regional Office-7 Director Brigadier General Anthony Aberin mibisita sa police nga naangol sa engkwentro tali sa mga Koreans.
Gipasalig sab sa PRO-7 sa pamilya sa maong police nga mopaabot sila sa gikinahanglan nga tabang aron maayo ug makabalik na sa trabaho ang police nga naangol. (BANAT NEWS)
- Latest