39 PUV wa kapasar sa roadworthiness

CEBU, Philippines —Nabatyagan sa Land Transportation Office Central Visayas nga nisaka ang gidaghanon sa mga public utility vehicles nga nituman sa roadworthiness test subay sa Oplan Biyaheng Ayos: Summer Vacation 2024 roadworthiness test kumparar sa nilabay nga tuig.

Ang LTO-7, nisusi sa 572 ka mga PUV sukad gilusad ang Oplan Biyaheng Ayos para sa semana Santa niadtong Marso 24 hangtud sa adlaw nga Biyernes Marso 29, 2024.

533 niini nakapasar sa roadworthiness inspection nga gihimo sa LTO7 personnel samtang 39 niini ang nahagbong sa inspection og wala makapadayon sa pagbiyahe sa ilang rota.

Matud pa ni LTO-7 Regional Director Glen Galario, nakita nila ang pagsaka sa pagsunod sa mga PUV karon tuiga uban sa ilang lima ka adlaw nga operation ikomparar sa nilabay nga tuig.

Sumala pa ni Galario ang region-wide inspections gihimo sa mga major nga terminals sa Central visayas uban sa pakig-alayon sa laing ahensya sa gobyerno aron sa pagsiguro sa safety and security sa riding public panahon sa semana Santa.

Gitug-an ni Galario sa higayon nga mahagbong ang mga PUV sa roadworthiness inspection ilang hatagan og panahon ang mga operators ug drivers sa pag correct sa mga depekto aron sila makabiyahe.

Si Galario nitug-an kasagaran sa ilang makita mao ang defective signal lights, wala ni function nga wiper/washer, buak nga windshield ug uban pa.

Ang LTO-7 nisusi usab sa mga PUVs kun aduna ba silay valid certificates of Public Convenience ug ang drivers aduna ba siyay valid nga driver`s license. Atol sa LTO-7 Oplan Biyaheng Ayos moabot sa 165 ang nadakpan atol sa Random roadside inspections sa rehiyon diin 5 niini ka motorcycles ang na impound human walay rehistro ang units.

Ang Oplan biyaheng ayos: Semana Santa and Summer Vacation 2024 matapos karon adlawa Marso 31, 2024 Easter Sunday.(BANAT NEWS)