PDEA nalipay nga walay driver ug conductor nga positibo sa drug test

CEBU, Philippines — Nalipay ang Philippine Drug Enforcement Agency (PDEA)-7 nga walay nagpositibo sa ilang gihimo nga random drug test sa mga bus drivers ug conductors sa Cebu South Bus Terminal niadtong Biyernes sa hapon, Marso 22, 2024.

Kapin sa 40 ka mga bus drivers ug conductors ang gipaubos sa drug test isip kabahin sa pagpangandam sa PDEA-7, PNP ug LTO-7 sa Semana Santa pagsiguro nga wala’y bisan usa nila ang mogamit og illegal nga drugas alang sa kaluwasan sa mga pasahero.

Sigon ni Leia Alcantara, tigpamaba sa PDEA-7 nga pinaagi sa surprise drug test mapaabot nila ang mensahe ngadto sa mga mogamit og illegal nga drugas nga dili na maghuwat nga masakpan sila nga nigamit niini.

Mas maayo nga sila mismo mangayo og tabang aron mapaubos sa treatment ug rehabilitation sanglit dako kaayo ang gisangon nga responsabilidad sa mga drivers ug konduktor ug kini mao ang kinabuhi ug kaluwasan sa mga sumasakay.

“To the employers in the transport system, we encourage them to strictly implement their drug-free workplace policies. They are mandated by law to implement this and dako nig impact sa productivity sa ilang companies”, sigon ni Alcantara. Alang sa mga dunay miyembro sa pamilya nga tiggamitan og ginadiling drugas awhag sa PDEA nga dili magpakahilom ug dili paundayunan ang pagkugumon sa bisyo.

Pwede modangop sa Local Government Units, sa mga treatment ug rehabilitation centers sa Department of Health ug pwede sab moduol sa PDEA aron matabangan sa referral process. “Ang importante, matagaan og intervention katong gagamit para mayo, because drug addiction is a disease”, dugang ni Alcantara.  MEL BANAT NEWS