122 ka kawani sa city hall makadawat og pasidungog

CEBU, Philippines — Gipaabot nga lain na usab nga mga trabahante sa Cebu City Hall ang hatagan og pasidungog atol sa kasaulogan sa Labor Day sa umaabot nga May 1, 2024.

Kini ang gibutyag sa pangulo sa Human Resource Development Office sa kagamhanan sa Dakbayan, Henry Tomalabcad.

Matud pa ni Tomalabcad ang maong kalihukan kabahin sa Program on Awards and Incentives for Service Excellence kon PRAISE Awards.

Ang maong Awards pagatawgon kini og Kakugi Awards diin sumala pa ni Tomalabcad, mismo si Cebu City Mayor Michael Rama maoy naghunahuna niini sa nilabay nga tuig diin mga rank and file nga trabahante nga nipakita og sakto nga kakugi og nagtinarong sa ilang pagserbisyo ang hatagan og plaque og kwarta.

Dugang pa ni Tomalabcad 122 ka mga trabahante ang pilion nga makadawat og Awards diin kini subay sa ika-122 nga katuigan sa Labor Day.

Ang pagpili sa mga hatagan og pasidungog mahimong ituboy sa ilang Department Heads o mga kaubanan, diin hangtud sa Marso 26, 2024 lang ang pagdawat niini ngadto sa PRAISE Committee. MEL BANAT NEWS