Kapolisan sa Dumanjug nag-imbestigar bahin sa bata nga biktima sa rape

CEBU, Philippines — Nahuman na sa paghimo og imbestigasyon ang Dumanjug Police Station pinangulohan ni Police Captain Jan Ace Layug labot sa pag-interview sa usa ka local radio station sa 4-anyos nga batang babaye nga giingong biktima sa pagpanglugos niadtong Marso 8, Biyernes sa Barangay Tangil sa maong lungsod.

Matud ni Police Captain Layug nga sa ilang gihimong pakisusi nasuta nga Marso 8, Biyernes nahitabo ang pag among-among sa bata ug nahibaw-an sa inahan ang insidente Marso 10, Domingo. Nahibaw-an sab sa kapolisan nga dihang nasayod ang inahan sa nahitabo sa iyang anak nanawag kini og media personality ug nangayo og tambag sa nahitabo sa iyang anak ug human miadto sa police station.  Gumikan kay nilapas naman sa oras nga makapahigayon og hot pursuit batok sa suspek ug dili na sab pwede dakpon gipabalik ang pamilya pagka Lunes, Marso 11.

Buntag sa Lunes kuyog sa menor de edad nga biktima ang iyahang inahan, iyaan ug maestra niini sa pag-adto sa police station.

Gipasulod og apil ang mga kuyog sa inahan ug biktima aron ma-relax sanglit adtong higayona ang inahan dili pa kaistorya og deretso kay nagsige og hilak.  Ang imbestigador sa WCPD Dumanjug Police Station ug personnel sa MSWD sa Lungsod nag-interview sa bata apan samtang gihimo kini giingong sekreto nga nag-video ang iyaan, wala nananghid ug gisend kini sa maguwang sa biktima nga mao sab ang nag-post sa Facebook nga karon deleted na.

Sa pag-interview sab sa biktima giingnan ang mga ginikanan nga confidential kini tungod kay rape incident kini ug minor ang biktima.

Human sa interview ang WCPD mihatag og referral sa pink room sa Vicente Sotto Memorial Medical Center ug Martes, Marso 12 miadto sila ug gipatan-aw ang bata nga biktima.

Adlaw’ng Miyerkules, Marso 13 sa wala pa sila nibalik sa police station niabot matod pa ang field reporter sa usa ka local radio station sa panimalay sa biktima ug ni-interview sa inahan ug menor de edad nga biktima nga nakita ug nadungog sa facebook live. Human ma interview, niadto na dayon sa police station ang inahan ug biktima aron pagsusi sa mga affidavits nga gi-andam ingon man pag sumetir sa resulta sa examination sa pink room. Nasayran nga gisumetir na sa Dumanjug Police Station sa ilang higher headquarters ang rekomendasyon sa ilang imbestigasyon diin nangayo sila og tabang sa ilang labaw sa posibleng kaso nga ipasaka batok sa ginikanan, nag-upload sa video o sa nagpahigayon sa interview.  MEL BANAT NEWS