Motorista patay human nisungag sa truck
CEBU, Philippines — Patay ang usa ka motorista human kini nasungag sa cargo truck samtang nagbiyahe kini sa national road diha sa Sitio Lourdes, Barangay Poblacion, Lungsod sa Liloan kagahapon sa kadlawon.
Ang biktima mao si Josh Laurente Raboy, 21-anyos, taga Barangay Lamac, Lungsod sa Consolacion.
Si Police Major Eric Gingoyon, hepe sa Liloan Police Station nagkanayon nga ang biktima nagsakay kini sa iyang Yamaha Nmax nga motorsiklo nga nagbiyahe paingon sa norte nga bahin.
Giingong sa paghidangat niini sa lugar nga nahitaboan diha kini mosubay sa pikas lane sa dalan ug gikasugat niini ang Isuzu cargo truck nga gimaneho ni Cherryle Tatoy Brigole, hingkod ang panuigon, taga Barangay Tabok, Dakbayan sa Danao.
Nagtuo ang kapolisan nga nakatulog ang biktima samtang nagpadagan kini sa iyang motorsiklo hinundan sa pagsimang niini sa pikas lane. Ug gumikan sa kusog nga impact ang motorsiklo nalamba ug nabunal usab ang biktima diha sa sementadong karsada ug nakaangkon og grabeng kadaot sa lawas. (BANAT NEWS)
- Latest