Gatosan ka balay naugdaw

CEBU, Philippines — Gatosan ka mga panimalay ang hingpit nga naugdaw sa sunog nga niulbo sa may Sitio Under the Bridge, Barangay Looc, Mandaue City, adlaw nga Martes pasado alas-12 sa udto kagahapon, Marso 12,2024.

Ang sunog giingong nagsugod sa panimalay ni Elisita Dinauanao. Sagad sa kabalayan naa sa ibabaw sa dagat ug ginama ang kadaghanan og gaay nga materyales.

Ang alarma giisa ngadto sa 3rd alarm ug hingpit nga napawong alas 2:16  na sa hapon. Gibana-bana nga P1.3 milyon ang danyos sa maong sunog.

Padayon pa ang imbestigasyon sa kabomberohan nga gipangulohan ni Supt. Arnel Abella ang Fire Marshal sa dakbayan.

Usa sa mga residente sa maong dapit ang nitug-an nga sa gamay pa kaayo ang kalayo nakatawag na siya sa Team Mandaue aron pagpahibalo nga adunay sunog.

Sumala pa ni Mae Buaron, pag-abot sa Looc Fire Brigade, dili pa kaayo dako ang kalayo apan tungod sa kakusog sa hangin dali kaayo nga nakakatap sa kabalayan.

Gibutyag sab niya sa sudlonon nga bahin sa kabalayan nagsugod ang kalayo.  Matud niya ikaduha na kini nga sunog sa ilang dapit, swerte lang tungod kay niadtong una dali ra natabang sa mga residente.

Si Kapitan Raul Kevin Cabahug, nitug-an nga dili momenos sa 600 ngadto sa 700 ka pamilya ang apektado ng anha una ipahimutang sa Looc Gym.

Dugang pa ni Cabahug, magtigum gilayon siya sa iyang konseho aron ilaha gilayon mahatag ang dinalian nga tabang subay sa mando ni Mayor Jonas Cortes.

Si Cabahug, nitug-an nga aduna pa silay calamity fund human isip bag-o nga kapitan wala pa siya nakagamit sa ilang mga budget.

Kun magagikan sa Mandaue City padung sa Lapu-Lapu City agi sa Mandaue-Mactan Bridge, naa nahimutang sa wala sa tiilang bahin niini ang nasunog.

Kahinumdoman nga sa pikas (tuo) nga bahin sa maong taytayan mao ang Sitio Paradise nga naigo sab og susama kadako nga sunog niadtong Nobiyembre 2023 diin gatosan sab ka balay ang naugdaw.

Atol sa pagkahitabo sa sunog kagahapon, pipila sa mga biktima sa sunog sa Sitio sa Paradise ang nakahinumdom og balik sa ilang kasinatian ug nabalaka nga posibleng motapon sab balik kanila ang kalayo.

Hinuon, sa dili mominos sa 700 ka pamilyang naapektahan sa sunog kaniadto, pipila nalang kanila ang namalik og tukod og balay sa maong dapit ibabaw sa dagat tungod sa kahadlok.

Sa latest nga talaan sa DSWS adunay dili mominos sa 193 ka paninamaly ang naapektahan, 230 ka pamilya o 721 ka tawo ang naapektahan. Padayon pa ang beripikasyon ug assessment sa mga nasunogan.

Samtang si Konsehal Jennifer Del Mar nga maoy chairperson sa committee on disaster risk reduction and management sa konseho sa siyudad miingon nga ang buhatan sa City Social Welfare  and Services nanglista na sa mga biktima aron sila mahatagan og luto  na daan nga pagkaon. IBM BANAT NEWS