Rama nimando paghunong sa pagpangubkob sa kadalanan

CEBU, Philippines — Gipahunong na ni Cebu City mayor Michael Rama ang tanang pagpangubkob sa kadalanan sa Dakbayan sa Sugbo apil na ang gihimo sa Cebu Bus Rapid Transit project.

Ang maong kamanduan gipadayag sa mayor kagahapon, Lunes human sa flag raising ceremony sa may Plaza Sugbo.

Matud pa sa Mayor tanan mga excavation permit gisuspenso pending sa inspection and compliance aron mahiuyon kini sa international standard.

Gimanduan sa mayor si City Administrator Collin Rosell uban ni Atty. Jerone Castillo sa strikto nga pagpatuman kung unsay nalatid ubos sa permit for excavation.

Lakip sa gipahibawo sa direktiba ang pangulo sa Department of Engineering and Public Works Engr. Joel Reston, Konsehal Jerry Guardo kinsa maoy chairman sa Executive Technical Infrastructure Committee.

Samtang apil sa gipahunong mao ang pagpangubkob nonot sa proyekto sa Bus Rapid Transit BRT.

Ang mayor nitug-an nga personal siyang mosuperbisar sa pagpasira lakip usab ang pagpanangtang sa tanang kagamitan ug i-impound kini.

Gimanduan usab sa mayor ang assistant city administrator Ian Hassamal, kinsa mao usab ang pangulo sa Department of General Services sa pagpreparar sa impounding area nga maoy butangan sa mga ekipo ug materyales nga masakmit.

Lakip sa gimanduan sa mayor mao si City Atty. Carlos Vincent Gimena sa pagpreparar sa bisan unsa nga legal action nga gikinahanglan.

Ang mayor nimando usab sa CCPO, Road Management Authority ug PROBE Team sa pagpaandam sa ilang force multipliers kun gikinahanglan sa higayon nga adunay taho may kalabutan sa pagpangubkob ug mo assist sa pagpatuman sa kamanduan. Andam usab si Rama nga makigtagbo sa tanang hingtungdan nga contractors kabahin sa maong kamanduan. MEL BANAT NEWS