Kapin sa 4,000 ka violators nakabayad og multa
CEBU, Philippines — Niabot ngadto sa 4,550 ka tawo nga nakalapas sa lokal nga ordinansa ang nadakpan atol sa usa ka semanang operasyon nga gipahigayon sa Lapu-Lapu City Police Office Ang maong operasyon gikan kini sa Pebrero 25 hangtud sa Marso 2, 2024. Nikabat ngadto sa P2,206,800 nga multa ang nakolekta sa kagamhanan sa siyudad gikan sa maong mga violator.
Police Lieutenant Christian Torres, tigpamaba sa LCPO nagkanayon nga lakip sa mga lokal nga ordinansa nga nalapas mao ang pagpanigarilyo diha sa publiko, pag-inom og ilimnong makahubog ug ingon man mga ordinansa nga naglambit sa trapiko ug uban pa.Matud ni Torres nga gihingusgan ang papatuman sa traffic ordinance alang kahapsay sa dagan ug ingon man ang paglikay sa mahitabong aksidente diha sa kadalanan.
Sa laing bahin, gitapok sa kapolisan sa LCPO ang mga molupyo nga badlongon ug kanhi nag-atubang og kaso ug nakagawas na gikan sa bilanggoan.
Si Police Colonel Elmer Lim, direktor sa LCPO nagkanayon nga ang maong lakang ilang gihimo ubos kini sa gipatuman nilang "LCPO Tsip Tok Program".
Gipasabot ni Lim nga ubos sa maong programa ilang gikalambigit ang mga opisyal sa barangay alang sa pag-ila sa ilang mga molupyo nga badlongon sama sa nalambigit sa pagpangawat, paggamit o pagbaligya sa ilegal nga drugas ug uban pa.
Matud ni Lim nga tapokon ang maong matang sa mga molupyo alang sa pakighinabi sa mga polis ug pagpahimangno kalabot sa ilang pagahimuon nga ilegal nga kalihokan tungod kay ubos na sila sa higpit nga pag-monitor sa kapolisan. Sa panagtapok nga himuon kuyog niini ang mga alagad sa simbahan nga naglakip sa mga lay minister o mga pastor sa nagkalain-laing relihiyon. (BANAT NEWS)
- Latest