75-anyos giputla’g liog

CEBU, Philippines — Giputlan og liog ug kamot sa usa ka 36 anyos ang usa ka 75 anyos nga biyuda gumikan sa kasuko nga papahawaon na sa yuta nga gitukuran sa iyang payag diha sa Purok Malubgas, Barangay Basdiot, Lungsod sa Moalboal, hapon sa adlaw'ng Lunes, Marso 4, 2024.

Ang biktima mao si Gomesinda Deniega Avenido, samtang ang suspek mao si Reno Arcelo Tereso, pulos taga Purok Malubgas, Barangay Basdiot.

Matud ni Police Captain Claudio Gako, Hepe sa Moalboal Police Station nga usa ka concerned citizen ang nanawag nga dunay nakit-an nga patay'ng lawas sa kasagbutan sa maong dapit.

Pag-verify sa kapulisan nakita nila nga ang biktima dunay mga samad sa kalawasan ug sa gihimong imbestigasyon dunay saksi nga nakakita sa suspetsado nga maoy nagbuhat sa krimen.

Pag alas-7 sa Lunes sa gabii nadakpan ang suspetsado atubangan sa usa ka mall sa National Highway, Poblacion East sa maong lungsod samtang kini gituohang padung moikyas tungod nagdala kini og mga gamit sakay sa iyang bisekleta.

"He is trying to clean up the scene gyud ba," sigon ni Gako.

Nigawas sa imbestigasyon sa kapulisan nga ang suspek nagdumot sa biktima kay papahawaon na kini sa yuta nga gitukuran sa iyahang payag nga gipanagiya sa namatay.

Kanhi tangkal sa baboy ang payag sa suspek nga iyaha ra pud gihangyo sa biktima samtang wala pa gamita.

Giingong nag-abot sa lugar ang duha kay ang suspek nangahoy ug ang biktima nagtugway sa mga binuhing kanding , giingong naglalis ang duha hangtud gitigbas ang biktima sa kamot ug naputol kini ug giusban sab liog maong napunggot kini gamit ang 20 pulgadas nga sundang.

Gikatakda nga pasakaan og kasong murder ang suspek. IBM BANAT NEWS