CBRT project manager gusto palagputon ni Rama

CEBU, Philippines — Gusto ni Cebu City Mayor Michael Rama  nga hulipan ang tagdumala sa Cebu Bus Rapid Transit project tungod sa gihulagway niyang mismanagement.

Ang mayor nitug-an nga makighinabi siya kang Transportation Secretary Jaime Bautista aron tangtangon sa project si CBRT project manager Norvin Imbong.

Ang mayor nitug-an nga kung gikinahanglan, personal niyang i-apelar ang pagtangtang ni Imbong sa proyekto ngadto kang President Ferdinand "Bongbong" Marcos Jr.

Ang mayor nipadayag sa pipila niya ka mga kasagmuyo sama sa pagkalangay sa mga proyekto ug kakuwang sa koordinasyon niini sa siyudad.

Ang mayor naglagot human gitugotan ni Imbong ang konkraktor sa pagpadayon sa trabaho nga wala maglantaw sa epekto niini sa trapiko.

Gusto usab makig-alayon sa mayor ngadto sa mga opisyal sa nasud aron tukion ang proyekto sa CBRT ug maoy iyang iduso ang original nga plano sa CBRT isip kabahin sa programa ni Marcos nga mao ang Build Better More project.

Maoy gusto usab masayran sa mayor kung unsay papel sa dakbayan sa Sugbo sa maong proyekto.— IBM  BANAT NEWS