Komisyon nga moabag sa mga Pilipinong gusto mo-abroad gibuksan

CEBU, Philippines — Bukas na ang buhatan sa Commission on Filipinos Overseas sa Syudad sa Sugbo karon.

Si Secretary Romulo Arugay, chairperson sa CFO nibutyag nga ang maong buhatan nagsugod na niadtong dekada 80 apan wala lang kini matagad.

Matud pa niya nga sa administrasyon ni Presidente Ferdinand Marcos Jr. gipalihok ang opisina aron matagad ang mga suliran sa mga Pilipino nga nanimuyo sa nagkalain-laing nasud.

Ang ilang buhatan mao sab ang moasistar sa mga Pilipino nga gustong mamuyo sa laing nasud. Gipasabot ni Arugay nga lahi ang buhatan sa Department of Migrant Workers (DMW) kay sila mao lang ang motutok sa mga tawo nga manarbaho sa gawas sa nasud.

Buot pasabot temporaryo lang ang ilang pagbiya sa Pilipinas ug mobalik na dinhi.

Apan sa CFO mao ang mga Pilipino nga adto na gyud mopuyo sa laing nasud ug mobalik lang sa Pilipinas kung kanus-a nila gusto.

Asoy pa ni Arugay nga sa dili pa makalarga ang mga Pilipino ila silang tudloan o hatagan og orientation labot sa nasud nga ilang adtoan aron dili ma culture shock.

Sigon pa niya nga makahimo sila sa pag asistar og 30 ngadto sa 50 og indibidwal sa opisina matag adlaw.

Sa ilang buhatan mahashasan na daan ang molarga aron di mabiktima sa human trafficking ug pagpangabuso.  IBM BANAT NEWS