Outreach program gihimo sa LCPO sa Barangay Bankal

CEBU, Philippines — Gipahigayon sa kapolisan sa Lapu-Lapu City Police Office ang Community Outreach Program nga giapilan sa usa ka gatus ka molopyo sa sitio Casia, Barangay Bankal siyudad sa Lapu-Lapu niadtong miaging adlaw.

Kabahin sa maong kalihokan mao ang pag-apod-apod og ayuda nga napulo ka kilong bugas, mga linata nga pagkaon sama sa sardinas, beef loaf ug noodles ngadto sa matag usa nga nanambong.

Si Police Major Karen Bancoleta, acting chief sa CCDAU mao ang nangu sa kalihukan uban ni konsehal Allen Godinez, Pastor Jotil Inoc uban sa mga sakop Special Weapon and Tactics (SWAT) nga maoy naghatag og siguridad sa lugar.

Lakip sa gihimo sa kapolisan mao ang pagpahigayon og lecture kabahin sa gihingusgan nga kampanya batok sa terorismo ingon man sa illegal nga drugas.

Gipasabot ni Police Major Bancoleta nga ilang gipasiugdahan ang programa sa tuyo nga paghatag og matinud-anon nga serbisyo sa katawhan lakip na ang pagpa-ambit sa kasayuran kabahin sa kahapsay ug kalinaw. (BANAT NEWS)