IBP ug Mandaue nigama og MOA pag-atiman sa kaso sa mga priso

CEBU, Philippines — Nagkahiusa karon ang kagamhanan sa Siyudad sa Mandaue ug ang Integrated Bar of the Philippines (IBP) Cebu City Chapter alang sa pagtagad sa giatubang nga mga kaso sa mga binilanggo sa Mandaue City Jail alang sa dali nilang paggawas isip paagi sa pagpaloag sa kahimtang sa sulod sa maong bilanggoan.

Nunot sa maong tinguha nga pagtinabangay nagpirmahanay nigama og memorandum of agreement (MOA) ang Dakbayan sa Mandaue ug IBP alang sa pagpatuman sa "Humanity Behind Bars: An Integrated Jail Decongestion and Management" program.

Gipahigayon ang pagpirmahanay sa MOA diha sa buhatan ni Mayor Jonas Cortes niadtong Lunes.

Atol sa maong kalihokan ilang gituki ang mga mahinungdanon nga pagahimuon alang sa pagpatuman sa Humanity Behind Bars program nga naglakip ang digital platform nga gitawag og Persons Deprived of Liberty (PDL) Management Data.     

Gidesinyo ang plataporma alang sa pag-inventory ug pag-monitor sa estado sa mga kaso nga giatubang sa matag PDLs, decongest jails, and facilitate efficient correctional facility management,

Si Jail Superintendent Jonathan Baltar sa Mandaue City Jail nagkanayon nga ang Mandaue City Jail gidesinyo kini alang lang sa 95 ka binilanggo apan niining mga higayona anaa na sa 1,000 ka binilanggo nga mga lalaki ang anaa sa maong pasilidad.

Nasayran nga hinungdan sa hinay nga pagresolba sa mga kaso nga giatubang sa matag binilanggo mao ang kakulang sa mga  korte nga mohimo sa paghusay niini. BDB BANAT NEWS