Feliciano nagpabilin sa katungdanan sa Task Force Gubat sa Baha

CEBU, Philippines — Ang Task Force Gubat sa Baha mohingusog sa ilang mga lakang pagbatok sa baha sa Dakbayan sa Sugbo.

Kini ang gipadayag ni Retired Colonel Jefferson Omandam, River Commander sa Task Force Gubat sa Baha.

Gibutyag ni Omandam nga ang maong plano nauyonan kini atol sa ilang panagtagbo niadtong Pebrero 12, 2024.

Lakip sa mga gitutokan sa task force ang Country Mall ug ang palibot niini aron malikayan ang susamang pagbaha nga nasinati sa maong dapit niadtong Septiyembre 2023.

Matud ni Omandam nga kasamtangang gitan-aw nila ang mga preventive measures aron mas mapahingusgan ang ilang pagpaningkamot samtang nagsingabot ang El Niño.

Apan gisiguro ni Omandam nga walay maapektohan nga mga istraktura tungod kay ilang nasubay ang gigikanan sa kusog nga bul-og sa tubig gikan sa bukirang bahin sa dakbayan.

Giklaro ni Omandam nga usa ka survey ang ilang gipahigayon sa bukirang dapit sa Barangay Apas alang sa posibilidad sa pagtukod og Gabion dam isip water catchment.

Gipadayag ni Omandam nga dugay nang giplano ang pagtukod og gabion dam uban sa City Disaster Risk Reduction and Management Office (CCDRRMO) ug sa Cebu City Planning apan moagi pa kini og mga intervention ug pagtuon aron mapatuman kini.

Sa laing bahin, ang organizational structure sa Task Force Gubat Baha sa Dakbayan sa Sugbo walay kausaban human magpabilin gihapon si Retired General Mel Feliciano isip chief implementer.

Kini ang gipahibalo atol sa labing unang tigom sa mga river commander sa task force sa nilabay’ng semana nga gipangulohan ni Atty. Jerone Castillo.

Si Feliciano magpabilin sa iyang katungdanan ug giubanan kini nila ni Omandan isip deputy commander ug Retired General Roy Cimatu isip chairman.

Niadtong buwan sa Disyembre sa nilabay’ng tuig nikanaog si Feliciano sa Task Force Gubat sa Baha human adunay wala mauyoni si Mayor Michael Rama apan nagkabalik ra ang ilang maayong kabubot-on human sila nagkahinabi.

Nasayran nga si Rama nangayo kini og dispensa kang Feliciano. BDB BANAT NEWS