P11 milyong shabu, mga armas nasakmit sa mga operasyon

CEBU, Philippines — Dugang kapin P11 milyones nga kantidad sa gituohang shabu ang nasakmit sa managlahi ug buwag nga mga operasyon sa mga otoridad sa nagpadayon nga kampanya batok niini dinhi sa rehiyon.

Sa Mandaue City nadakpan sa buybust operation diha sa NRA, Barangay Subangdaku  Huwebes sa gabii si Mitchell Abellaneda, 32, residente sa Mahayahay A. Lopez Street, Barangay Calamba, Dakbayan sa Sugbo.

Si Abellaneda giingong usa ka High Value Individual City Level maong gipuntariya kini sa City Intelligence Unit sa Mandaue City Police Office uban sa Philippine Drug Enforcement Agency Central Visayas.

Nasakmit gikan kaniya ang 100 grams sa gituohang shabu nga mobalor og P680 mil ug buy bust money.

Laing nasikop sa buy-bust operation Biyernes sa kaadlawon sa M.L Quezon Street, Barangay Maguikay sa mao gihapong siyudad si Rogelio Gajudo, 56, taga Barangay Buhisan, Cebu City  nga usa gihapon ka HVI Regional Level.

Nasakmit gikan kaniya 1.025 kilos sa gituohang shabu nga mobalor og P6,970,000.00  ug buy-bust money.Niadto sab Huwebes sa gabii, milusad og kaugalingong operasyon ang mga sakop sa PDEA-7 batok sa usa ka mananagat  ug E-bike drayber nga giingong parehong nalambigit sa ilegal nga drugas diha sa Sitio San Rafael, Barangay Tanke, Dakbayan sa Talisay.

Ang nasikop mao si Egie Abenes Relampagos alyas Ejay ug Kong-Kong, 30 anyos nga usa ka mananagat ug ang iyang kauban nga E-bike drayber nga si Randy Mabala Daan alyas Jakilo, 34, pulos nagpuyo sa maong dapit. Ang mga operatiba nagpakaharon ingnon nga mopalit og drugas hangtud nga natigayon ang pagdakop.

Si Police Lt. Col. Wayne Magbanua, hepe sa kapolisan sa Talisay nitataw nga naila na nga High Value Individual (HVI) si Relampagos.

Nakuhaan ang mga dinakpan og drugas nga nitimbang og 600 gramos nga adunay gibana-bana nga P4,080,000. Usa sab ka .9mm nga pistola ang nakuha gikan kanila nga adunay upat ka bala.

Samtang nadakpan sab si Christian Ian Tabilon Alfar alyas Ian, 25, diha sa Sitio Rattan, Barangay Tanke sa nahisgutang siyudad kagahapon sa kaadlawon ug nakuhaan kini og 15 gramos nga adunay balor nga P102 mil ug usa ka .45 nga pistola nga adunay upat ka bala.

Ang mga dinakpan gibalhug sa bilangguan nga gikatakda nga pasakaan og kaso sa adlaw nga Lunes.

Nasikop sa mga operatiba sa Philippine Drug Enforcement Agency (PDEA) Bohol Provincial Office uban ang Bohol Maritime Police Station , Bohol Police Provincial Unit ug uban pa ang tulo ka indibidwal sa ilang buy-bust operation sa Purok 2, Barangay  Cogon, Tagbilaran City sa maong lalawigan.

Ang mga nadakpan mao ang mag live-in partner nga Sarah Jane Espejo, subject sa buy-bust operation, 29, sidewalk vendor ug Nelmar Maputol, 39, construction worker ug nag-operate sa drug den sulod sa ilang balay.

Sikop sab si Anthony Baliling, 28 anyos, tigbisitahan sa drug den. Nakuhaan ang nga dinakpan og walo ka putos sa gituohang shabu ng nagkantidad og dul-an P80,000, buy-bust money, duha ka cellphones ug mga drug paraphernalia. — IBM BANAT NEWS Romeo  T.  Limpangog ug Gabriel Bonjoc