Beal nangu sa Suns paglampornas sa kanhi team

CEBU, Philippines — Si Bradley Beal mipabuhagay og season-high 43 puntos aron pangulohan ang Phoenix Suns ngadto sa 140-112 nga paglampaso sa kanhi niya team nga Washington Wizards sa NBA kagahapon didto sa Capital One Arena.

Ang 30-anyos nga si Beal mipasud og 16 sa 21 niya ka itsa apil na niini ang lima ka 3-pointers ug wa sab siyay sipay sa pito niya ka free throws. Iya pang gipalamanan ang eksplosibo niyang opensa og unom ka assists, duha ka steals, ug duha ka blocks.

Si Beal maoy No.3 overall pick sa Wizards niadtong 2012 NBA Draft. Nakaduwa siya sa Washington sud sa 11 ka tuig sa wala pa gi-trade ngadto sa Suns niadtong Hunyo sa miaging tuig.

Si Kevin Durant midugang og 18 puntos alang sa Suns, nga nagkupot na karon og 29-21 rekord samtang gipahagsa ang Wizards ngadto sa 9-40.

Sa laing bahin, si Jayson Tatum mipupo og 34 puntos, walo ka rebounds ug pito ka assists sa dihang gikastigo sa Boston Celtics ang Memphis Grizzlies, 131-91.

Si Kristaps Porzingis midonar og 26 puntos alang sa Celtics nga miinat sa labing nindot nga baraha ning season ngadto sa 38-12.

Sa ubang mga resulta, si Kawhi Leonard miharos og 25 putnos ug 11 ka rebounds sa dihang gipaksit sa Los Angeles Clippers ang Miami Heat, 103-95, samtang si Lauri Markkanen mitali og 21 puntos sa dihang gibihag sa Utah Jazz ang Milwaukee Bucks, 123-108.