30 balay sa Tingub naugdaw
CEBU, Philippines — Dili mominos sa 30 ka mga panimalay ang naugdaw sa sunog nga niulbo sa dalan B. Suico , Upper Tingub, Mandaue City sa Sabado sa gabii.
Ang sunog gikatahong nagsugod sa panimalay ni Sammy Benigay.
Ang sunog giisa lang ngadto sa 2nd alarm ug hingpit napawong alas-8:58 sa gabii. Walay gikataho nga nakalas o naangol atol sa pag-ulbo sa maong sunog.
Gibana-bana nga moabot ngadto sa P650 mil ang danyos sa maong sunog.
Ang kabomberohan pinangulohan City Fire Marshal Supt. Arnel Abella miingon nga naghimo pa sila og imbestigasyon may kalabutan sa hinungdan sa pag-ulbo sa maong sunog.
Kagahapong adlawa, giapud-apod na sab mga personnel sa buhatan sa Mandaue City Social Welfare Services (CSWS) ang hinabang para sa mga nasunogan.
Ang CSWS nag-profiling sab sa mga biktima aron masigurong mahatagan ang tanang mga nasunogan nga karon temporaryong nipasilong sa
Tingub Elementary School.
Sumala pa sa City Disaster Risk Reduction and Management Office (CDRRMO) 44 ka pamilya o 134 ka individual ang nawad-an og ilang balay nga kapuy-an.— /IBM (BANAT NEWS)
- Latest