100 sewing machines gihatag sa mga nawad-an og trabaho sa Lapu-Lapu

CEBU, Philippines — Ang Department of Labor (DOLE), pinaagi ni Lapu-Lapu City Mayor Junard “Ahong” Chan, nang apod apod og 100 ka sewing machines nga mikantidad og kapin sa P500,000 ngadto sa mga kawani nga nawad-an og trabaho diha sa dakbayan.

Gipahibawo sa pangu sa Public Employment Service Office (PESO) nga si Kim Francisco pinaagi sa usa ka statement nga gipagawas sa Public Information Office nga ang Mactan Apparels Incorporated, usa ka garment factory exporter, mao ang midonar sa maong mga sewing machines alang sa ilang kanhi mga trabahante.

Kahinumduman ang Mactan Apparels nisira sa ilang operations diin libuan sa ilang mga garment sewers ang nawad-an og trabaho.

Ang kompaniya mihatag kanila og separation pay, ug ang gobyerno mihatag usab og cash assistance, samtang pipila usab ang nahatagan og livelihood.

Dugang pa ni Francisco nga kini maoy kabahin sa livelihood program nga gitanyag sa Lapu-Lapu ngadto sa mga displaced workers.

Ang mga Oponganon workers nga nawad-an usab sa ilang trabaho ang nakadawat og cash assistance gikan sa mayor pinaagi sa Social Welfare's Assistance for Individuals in Crisis Situations (AICS) ingon man livelihood pinaagi sa DOLE.

Ang Lapu-Lapu City Cooperative and Livelihood Resource Center (LCLRC) mihatag usab og training ingon man livelihood ngadto sa mga residente sa siyudad.

Suma pa ni Francisco nga ang mga makadawat og sewing machine mahimong magtukod og tailoring o garment shop aron makasugod sa ilang negosyo.

Ang Mactan Apparels opisyal nga mi turned over sa mga makina ngadto sa dakbayan ug si mayor Chan mao ang nag apod apod niini ngadto sa mga beneficiaries.

“Motuo ta sa panultihon nga give a man a fish and you feed him for a day. Teach him how to fish and you feed him for a lifetime. Maong pinaagi sa pakig alayon sa DOLE VII, atong gi-apod apod ang 100 ka mga brand new high speed sewing machines sa mga beneficiaries nga ilang magamit para sa ilang panginabuhian isip mananahi,” pagbasa sa facebook post sa mayor. — /MEL (BANAT NEWS)