Night market sa Colon nakatampo og P2 milyones sa siyudad

CEBU, Philippines — Bisan pa sa pag-angkon nga mas ubos ang ilang gikita sa night market karong tuiga, ang mga nag-organisar sa night market nakaamot og di momenos P2 milyones sa kagamhanan sa dakbayan gikan sa kinatibuk-ang kita sa mga vendors.

Gibanabana ni Maria Pino nga kini "successful, peaceful, and orderly."

"At least we come up na di kaayo daghan ang nga reklama nga atoang naagian or natagamtanan sa atong mga commuters,” sigun ni Pino sa pakighinabi kaniya kagahapon, Domingo.

Matud ni Pino, naedukar na ang mga vendors sa guidelines nga gipatuman sa night market diha sa dalan Colon.

Giablihan ang Colon Night Market niadtong Oktubre 2023, tulo ka adlaw kada semana.

Apan gihimo kining kada adlaw gikan sa Nobyembre 16 hangtod sa Disyembre 30, 2023. Nahunong kini kadiyot ug giablihan pag-usab niadtong Enero 5 hangtod ning pagsulat sa balita.

“Ing-ana man gud ang sistema nato sa night market, dili diretso-diretso bitaw, kay atong tagaan og higayon nga moluag pud atong Colon kay di ra man pud kita ra ang nag gamit sa Colon,” matud pa ni Pino.

Kung itandi sa sa miaging tuig 2022, giangkon ni Pino nga mas gamay ang gikita sa mga vendors karong tuiga.

Miabot P1.696 milyones ang koleksiyon sa Cebu City Government gikan sa Colon Night Market activity gikan sa Nobiyembre 2022 hangtod Nobiyembre 2023 gikan sa “arkabala” sa mga vendors.

Si Mare Var Reyes, Cebu City Treasurer nibutyag nga ang koleksiyon gikan sa ilang “arkabala” tag P10 hangtod sa P50, depende sa gidak-on sa stall ug lain sab ang arkabala sa P200 nga stall rental matag gabii.

Hinuon si Pino niingon nga mas taas ang kita sa mga vendors dihang bag-o lang kining giablihan niadtong Nobyembre 2023 hangtod sa Disyembre.

Si Pino mapasalamaton gihapon kay nakatabang sila sa mga vendors ug malaumon silang maayo gihapon ang negosyo para sa tanan karong tuig 2024. — /IBM (BANAT NEWS)