Libreng operasyon itanyag diha sa CCMC

CEBU, Philippines — Nonot sa pagsaulog sa dakbayan sa Sugbo sa ika- 87 nga Charter Day, adunay libreng operasyon ang itanyag alang sa mga Cebuanos diha sa Cebu City Medical Center.

Ang maong kalihukan gitawag og “Ang Tugon sa Bugon:Libreng Operasyon”, ug ang maong libreng operasyon inabagan usab sa CCMC- Sacred Heart Hospital Consortium Department of General Surgery uban sa Cebu Medical Society and Philippine College of Surgeons - Cebu Eastern Visayas Chapter.

Lakip sa mga kaso nga operahan mao ang bugon sa suso, intestine, thyroid, gall bladder, neck, uterus ingon man sa ovary.

Malakip ang ubang mga kaso depende na sa assessment sa mga doctor.

Alang niadtong interesado mahimong makabisita sa Outpatient Department sa CCMC gikan sa Lunes hangtud sa Biyernes gawas lang sa holidays ug pangitaa lang si Dr. Ryan O. Cabahug.

Samtang sa laing bahin sayo ning buwana, duha ka mga deparment sa CCMC ang nakakuha og re-accreditation gikan sa ilang tagsa tagsa ka organizations alang sa mosunod nga tulo ka tuig.

Gipahibawo sa CCMC nga ang ilang Department of Pediatrics nakakuha og re-accreditation gikan sa Philippine Pediatric Society.

“A well-deserved recognition for your commitment to maintaining high standards in pediatric care,” pagbasa sa post sa CCMC. Ang Department of Internal Medicine nakakuha usab og re-accreditation sa Philippine College of Physicians.

Pinaagi sa maong mga recognition nasuta nga ang maong mga department komitido sa paghatud og kalidad nga serbisyo sa panglawas.

Kahinumduman gipadayag ni Cebu City Mayor Mike Rama ang iyang panglantaw sa CCMC nga usa ka “poorman’s hospital with a richman services” nga tinguha niya nga makompleto sa dili madugay. — /MEL (BANAT NEWS)