Traffic light system nga mogamit og AI giinstalar sa SRP

CEBU, Philippines — Usa sa joint venture partner sa Cebu City sa South Road Properties (SRP) niinstolar og traffic light system nga mogamit og artificial intelligence (AI) sa mga operasyon niini sugod sa tunga-tunga sa buwan sa Pebrero niining tuiga.

Ang Filinvest Land, Inc. niinstolar sa pasilidad diha sa T-junction sa Cebu South Coastal Road uban sa El Paso Street, ang south border sa City di Mare, sa 40-hectare JV project niini uban sa kagamhanan sa siyudad.

Ang traffic lights adunay test run pipila ka adlaw sa wala pa ang Sinulog 2024 matud ni Engineer Gwen Sala, FLI assistant general manager for CdM diha sa Sugboanon channel.

Gihulagway ni Sala nga ang maong traffic light system usa ka smart system nga maka-detect sa volume sa trapiko.

Gilaoman nga mogana kini aron ang dagan sa trapiko sa main thoroughfare dili mabalda kon ang mga lights mobalhin aron pagtugot sa ubang mga sakyanan nga moliko sa wala gikan sa habagatan ug kasadpan nga intersection.

Giingong ang intersection mag-serve kini sa mga kliyente diha sa mga opisina sa siyudad nga nahimutang sa maong dapit uban sa mga residente sa CdM sa Amalfi ug Sanremo Oasis medium-rise residential condominiums ug IL Corso lifestyle mall Sala.

Ang control system sa AI-aided traffic lights ang gipahimutang diha sa CCTO matud ni FLI GM for the Visayas, John Paul Escario.

Sa nilabayng duha ka semana,si Cebu City Councilor Rey Gealon, chairman sa traffic management committee nipadayag sa ideya pinaagi sa usa ka resolusyon ngadto sa konseho siyudad sa paggamit  og AI sa pagdumala sa trapiko sa mga sakyanan sa siyudad ug pagsiguro nga hapsay ang dagan sa mga emergency nga sakyanan.

Gipadayag ni Gealon nga ang teknolohiya karon nagtugot sa lapad nga aplikasyon sa AI nga nitumaw isip usa ka benepisyo alang sa kaayohan sa lain-laing sektor.

Nunot niini, ang FLI nihimo usab og test run sa tulo ka coaster-size nga mga bus.

Nitanyag sila og libreng sakay paingon sa SRP ug pabalik atol sa Sinulog 2024 kagahapon.

Ang FLI nga platinum sponsor sa Sinulog sa Sugbo Philippines 2024 nihatag usab sa civic center niini sa CdM isip venue sa mga kalihokan sa Sinulog sa ikaduhang sunod-sunod nga tuig. — /BDB (BANAT NEWS)