Garcia giimbitar sa Russian Ambassador

CEBU, Philippines — Si Gobernador Gwendolyn Garcia sa Probinsiya sa Sugbo giimbitar ngadto sa St. Petersburg sa Russia alang sa 2024 Economic Forum karong buwan sa Hunyo niining tuiga ug sa pagtuki usab sa posibleng renewal sa sisterhood nga kasabotan tali sa probinsiya ug nahisgutang langyaw nga siyudad.

Si Russian Ambassador to the Philippine Marat Pavlov ang personal nga niimbitar sa gobernador atol sa pagbisita niini diha sa Kapitolyo sa nilabay ng Biyernes.

Ang sisterhood nga kasabotan tali sa St. Petersburg ug Probinsiya sa Sugbo ang na-expired na kini diin una kining gilagdaan niadtong tuig 2009 base sa taho sa Sugbo News.

Nasayran nga atol sa ikaduhang termino isip gobernador ni Garcia ang Probinsiya sa Sugbo ug St. Petersburg nigama og lima katuig nga sisterhood agreement aron sa pagpalapad sa ilang kooperasyon kabahin sa turismo, socio-cultural, ug economic development.

Ang St. Petersburg maoy ikaduhang labing importanteng economic, scientific, ug cultural center sa Russia sunod sa Moscow.

Si Pavlov nibutyag kang Garcia nga niadtong tuig 2023, ang St. Petersburg nagpahigayon og economic forum diin ang proposal mao ang reviving ug pagpalig-on sa ilang kooperasyon tali sa Probinsiya sa Sugbo samtang gituki usab ang posibilidad sa pagbag-o sa sisterhood pact niini sa maong langyaw nga dakbayan.

Si Garcia nipadayag sa iyahang positibong tubag ilabi na ang pag-renew sa sisterhood tali sa St. Petersburg.

I would be very, very interested, Your Excellency, in renewing ties with St. Petersburg because there is much that we can benefit from, both ways, both for St. Petersburg and of course for Cebu, matud ni Garcia.

Gihisgotan sa nahisgutang duha ka opisyales ang posibilidad sa pag-establisar og direct flights gikan sa Sugbo ngadto sa St. Petersburg ug vice versa lakip niini ang kabahin sa people-to-people exchanges.

Ang Russian ambassarod giubanan kini ni Russian Honorary Consul Armi Garcia ug sa iyang mga kauban nga Russian delegate. — /BDB (BANAT NEWS)