Bee farm giplanohan nga tukoron sa Cebu City Eco-Park

CEBU, Philippines — Giplanohan karon sa kagamhanan sa dakbayan sa Sugbo ang usa ka bee farm ingon man ang transformative solutions alang sa waste management nga ibutang diha sa kanhi Cebu Zoo nga karon gitawag na og Cebu City Eco-Park diha sa barangay Kalunasan, ning dakbayan.

Ang bee farm nakita nga makapalambo sa pollination diha sulod sa park ug makahatag og lugar alang sa edukasyon.

Si Oliver Patlingrao, usa ka retired agriculturist mibutyag pinaagi sa Sugboanon channel nga ang bees gikinahanglan aron sa pag-promote sa pollination ug makalambo sa ecosystem sa lugar o sa tibuok eco-park.

Ang pollination gikinahanglan alang sa pagpalambo sa agrikultura ug modugang sa food production suma pa ni Patlingrao.

Ang bee farm mahimo usab nga educational ug informative sa mga tinun-an nga mobisita sa eco-park.

Dungan niini si Patlingrao mipadayag og kaandam sa pagtabang aron mapatukod ang maong bee farm diha sa CCEP.

Gawas niini si Patlingrao andam motabang sa CCEP pagbutang og edible landscaping, pagpatubo sa mga organic vegetables, fruits, herbs, ug medicinal plants pinaagi sa paggamit sa landscaping techniques.

Lakip sa giplano mao ang paghimo og transformative solutions isip kabahin sa waste management diha sa mga komunidad nga haduol sa waterfronts ug waterways.

Ang Coastal Conservation and Education Foundation, Inc. (CCEF) nga gipanguluhan ni Evelyn Dequit mipresentar sa mga recycled waste ug organic-based products nga mahimong ma produce sa kabarangayan pinaagi sa pagpahigayon og training.

Pipila niini nga mga produkto mao ang eco-marine lumber nga ginama sa recycled plastics with aluminum nga mahimong magamit alang sa house flooring ug walling, pipila usab mahimong signboards ug plastic bags nga ginama sa 100 percent cassava ang gipresentar nga mahimong ma-produce sa mga residente sa siyudad. — /MEL (BANAT NEWS)