Senador Go nanghatag og ayuda sa nasunogan sa barangay Carreta

CEBU, Philippines — Personal nga gibisita kagahapon ni Senador Bong Go ang 173 ka pamilya nga nasunogan sa barangay Carreta sa dakbayan sa Sugbo niadtong Enero 5, 2024.

Ang pagbisita sa senador sa evacuation center sa Carreta Elementary School, diin temporaryong gipahiluna ang 631 ka mga indibidwal nakahatag og kalipay sa mga nasunogan nga kasagaran nawad-an sa ilang mga panimalay.

Ang senador maoy nangulo sa pagpanghatag sa Balde Sunog Packs, water containers, packed meals, Water Container w/ Sticker, beltbags, shirts, basketballs, volleyballs, sockets, keychains, calendars, vitamins, ug facemasks.

Ang mga swerteng mananaog nakadawat usab og bike, cellphone, sapatos alang sa mga lalaki ug babaye, ug uban pa.

Lakip sa ayuda nga gihatag sa senador mao ang housing assistance pinaagi sa Emergency Housing Assistance (EHAP) sa National Housing Authority, nga nagtinguha sa paghatag og financial aid ngadto sa mga pamilya nga nawad-an sa ilang panimay gumikan sa kalamidad sama sa bagyo, landslides ug sunog.

Kini aron makatabang kanila sa pagtukod og balik sa ilang mga panimay ingon man makahatag nila og higayon nga makabarog pagbalik.

Samtang ang mga pinili kun selected beneficiaries modawat usab og training/assistance gikan sa Department of Trade and Industry pinaagi sa ilang Pangkabuhayan sa Pagbangon at Ginhawa (PPG).

Si Barangay Carreta Councilor Rhodora Pyls miingon nga mokabat sa 155 ka pamilya ang gitugutan nga makabalik sa ilang orihinal nga lugar diha sa sitio Kalapukan human sa reblocking.

Ang reblocking gipaabot nga makompleto sa dili pa matapos ang buwan sa Enero aron ang mga apektado nga residente makabalik na sa ilang gipuy-an tungod kay gihatagan lang sila og 15 ka adlaw sa pag-estar sa evacuation center.

Suma pa ni Pyls nga ang barangay nakapagawas na og P200,000 alang sa mga biktima sa sunog apan kini gamiton sa pagpalit og lima ka kilong bugas sa matag pamilya.

Dugang pa niini nga mapasalamaton sila sa senador ingon man sa mga pribadong organisasyon gumikan sa ilang padayon nga pagsuporta sama sa pagkaon, senina, mga tambal ug uban pa nga kinahanglan sa mga fire victims.

Ang senador gikuyogan ni kanhi Secretary Michael Lloyd Dino sa Office of the Presidential Assistant for the Visayas ingon man sa actor nga si Phillip Salvador. — /MEL (BANAT NEWS)