Lalaki nga nitulis sa mga babaye nailhan na
CEBU, Philippines — Nailhan na sa Cebu City Police Office (CCPO) ang tulisan nga nangbiktima og duha ka babaye diha sa Purok 6, Sitio San Miguel, Barangay Apas, Siyudad sa Sugbo niadtong Lunes sa kadlawon.
Matud ni Police Lieutenant Colonel Janette Rafter, deputy city director for operations sa Cebu City Police Office nga ang maong suspek kadaghan na nadakpan gumikan sa pagpangawat, kalambigitan sa ilegal nga sugal ug drugas.
Nailhan ang suspek pinaagi sa saksi nga nakuha sa kapolisan ug nasubay sa Crime Incident Reporting and Analysis System (CIRAS) sa CCPO ang mga kaso kaniadto sa maong tulisan kinsa residente usab sa Barangay Apas.
“Klaro kaayo sa CCTV ang iyang nawong, base sa atong CCTV ug impormasyon pod sa atong mga witnesses bahin atong panghitaboa is positively identified nani siya karon”, matud ni Rafter.
Naghimo na og hot pursuit operation ang kapolisan sa Mabolo Police Station 4 pinangulohan ni Police Major Eraño Regidor uban sa City Intelligence Unit.
“Base sa atong record naa ni siya lima, arrested for five times sa robbery”, butyag ni Rafter.
Nasayran nga ang suspetsado nakagawas gikan sa prisohan ubos sa plea bargaining.
Giklaro ni Rafter nga bisan og usa ray nakita sa CCTV nga nanulis apan nahibaw-an nga adunay laing kuyog ang suspetsado nga naghuwat ug nailhan na usab kini sa kapolisan.
Sa laing bahin, bisan og naka-mask ang kawatan nga nisulod sa coffee store diha sa Salinas Drive, Barangay Lahug pagka alas 5:00 sa buntag niadtong Lunes nailhan na usab kini sa kapolisan.
Sayo pa, ang maong coffee store gitulis na usab kini nidtong buwan sa Oktubre tuig 2023.
Gawas sa nagkaguliyang nga gamit, walay nakuha ang kawatan tungod kay gihipos sa nagdumala sa establisamento ang kwarta human maleksiyon sa nahitabo nila sa niaging tuig. BDB (BANATNEWS)
- Latest
