Gusto molayat sa bridge napugngan

CEBU, Philippines — Nabulabog ug nangaratol ang mga pasahero sa modern jeepney kagahapon sa buntag human usa sa mga pasahero ang kalit nipagawas og kutsilyo sa tunga-tunga sa ilang biyahe diha sa Marcelo Fernan Bridge habig sa dakbayan sa Mandaue.

Ang lalake nga nibunot og kutsilyo matud sa kapolisan nga usa kini ka 46-anyos ug residente sa Barangay Mactan, dakbayan sa Lapu-Lapu.

Ang rota sa maong pasaheroan gikan sa Barangay Punta Engaño sa dakbayan sa Lapu-Lapu paingon sa Park Mall sa dakbayan sa Mandaue.

Matud pa namugos kini nga mokanaog pagabot tungatunga sa maong taytayan apan wala mosugot ang drayber kay delikado kini ug kalapasan sab kini sa balaod sa trapiko.

Sigon sa drayber nga si Isidro Del Cruz iretable kaayo ang suspek ug namugos gyud, apan dihang iyang nakita nga nibunot kini og kustsilyo napugos gyud siya sa paghunong sa iyang mini-bus aron tumanon ang demanda niini.

Gumikan sa maong hitabo nangaratol ang mga pasahero, dunay mga bata nga nanghilak ug na-trauma sa maong hitabo.

Dali hinuon nga  nakaresponde ang kapulisan sa dakbayan Mandaue ug sa ilang pag-abot sa dapit nitahan ra hinuon dayon sa iyang kaugalingon ang suspek.

Sa pakighinabi sa DYSS Super Radyo Cebu, ang suspek miingon nga wala siya’y plano mopasakit og tawo.

Matud pa niya gusto niya manaog sa jeep sa tunag-tunga sa taytayan kay gusto siyang maghikog pinaagi sa paglayat gikan sa taytayan paingon sa dagat tungod sa iyang dakong problema.

Sa pagkutlo ning maong balita padayon ang imbestigasyon sa Mandaue City Police Office aron pagtino sa kun unsay tukmang buhaton batok sa suspek. (BANAT NEWS)