Gidunggab sa kainom, sa ospital mag Pasko

CEBU, Philippines — Nalandig sa tambalanan ang usa ka 49-anyos nga lalake human kini gidunggab sa iyang gikainom sa Barangay San Rafael, Lungsod sa Barili pasado alas 7 sa gabii sa adlaw'ng Biyernes, Disyembre 22, 2023.

Ang biktima mao si Earl Jean Dabon, 24 anyos  ug ang suspek mao si Arnel Pancho Abonales, 40, ang duha pulos residente sa Barangay San Rafael.

Sa imbestigasyon sa Barili Municipal Police Station ang biktima ug ang suspect nag-inom apan giingong nagkabinayloay og sakit nga pulong duha  hinungdan nga gisumbag matod pa sa biktima ang suspect.  Human nasumbagan sa biktima ang suspect, niuli sa ilang balay ang suspect ug nikuha og kutsilyo.

Pagbalik sa suspect nagharong pa ang duha kay wala makabantay ang biktima nga nagdala og kutsilyo ang suspect.

Gamit ang 8 inches nga kutsilyo gidunggab ni Abonales si Pancho sa bukton ug tuo nga dughan.

Dali nga gidala ang biktima sa Barili District Hospital ug karon padayon kining nagpaalim sa samad nga naangkon resulta sa pagpanunggab.

Nadakpan hinoon dayon sa kapulisan sa Lungsod sa Barili ang suspect ug nakompiskar sab ang kutsilyo nga gigamit niini sa pagpanunggab.

Ang suspetsado nga naa karon sa kustodiya sa kapulisan mag-atubang og kasong Frustrated Homicide. (BANAT NEWS)