Mga sakop sa RMFB, force multipliers lakip nga ipatakap sa Misa de Gallo  

CEBU, Philippines —  Katambayayong sa Cebu City Police Office (CCPO) ang ubang ahensiya sa gobiyerno ug force multipliers sa pagbantay sa mga simbahan sa pagsugod sa Misa de Gallo.

Matud ni Police Lieutenant Colonel Janette Rafter, deputy city director for operations sa Cebu City Police Office nga sa inventory nga ilang gibuhat 34 ka simbahan sa siyudad ang mopahigayon og Misa de Gallo diin 22 niini mga dagko sama sa Cebu Metropolitan Cathedral, Basilica Minore del Sto. Niño ug Sto. Rosario Parish Church.

Adunay gipakatap nga mga polis ang CCPO sa mga simbahan diin dili lang mga personnel sa CCPO ang nagbantay apil niini ang 60 ka polis gikan sa Regional Mobile Force Battalion (RMFB)-7 nga gi-augment sa Police Regional Office-7 ngadto sa CCPO.

Anaa usab sila’y gipangpili nga mga simbahan nga 24 oras ang seguridad nga ipatuman diha sa palibot.

Giklaro ni Rafter nga andam na ang CCPO sa pagbantay sa holiday season.

Ipatuman usab sa CCPO ang curfew ordinance ilabi na sa mga menor de edad nga naglatagaw sa kadalana, nag-inom ug tapok aron malikayan ang mga kasamok nga mga menor de edad ang nalambigit.

Kagahapon si Police Colonel Ireneo Dalogdog, direktor sa CCPO uban ang National Intelligence Coordinating Agency(NICA) nagtagbo ug nagbinayloay og impormasyon ilabi na mahitungod sa bisan unsang hulga mga makabalda sa kahapsay ug kalinawo sa siyudad. Nimando si Dalogdog sa iyang mga sakop ilabina sa Police Station 3 nga mohimo og checkpoint sa mga sakyanan nga sakay sa barko isip kabahin sa ilang preparasyon sa holiday season.

Sa laing bahin, dili lang ang mga simbahan sa Dakbayan sa Talisay ang pahigayonan sa Misa de Gallo sugod karon.

Ang mga Talisaynon nga manimbahay mahimo nang makasimba diha sa basketball gym ug sa mga kapilya. Si Jonathan Tumulak, pangulo sa City of Talisay-Traffic Operation Development Authority (CT-TODA) nagkanayon nga 28 ka lugar sa siyudad ang pahigayonan sa Misa de Gallo tumong niini nga dili magdasok ang manimbahay ug dili usab makabalda sa trapiko. BDB (BANATNEWS)